Una nueche de rock y un sábadu tradicional de romería, con conciertos a última hora, ye l’enfoque qu’Esto Ye Ciares pretende dar a les sos Fiestes Populares que van tener llugar pa Santiago, el 25 y el 26 de xunetu, nel campu de fútbol del UC Ceares
El rock y la música tradicional van protagonizar caúna de les dos xornaes de les Fiestes Populares de Ciares, que yá tienen cartelu. Esto Ye Ciares caltién el vienres de guitarres llétriques qu’arrancará a les 19 hores con Dinosaurio Meteorito y enfoca’l sábadu a recuperar una romería tradicional, más orientada a les families, con presencia única de música del país. Ésta va pesllase con una folixa dende les 20 hores con grupos que beben de la tradición y un DJ p’animar el tramu final hasta’l pieslle previstu pa les 4 hores.
El vienres 25 de xunetu, amás de la banda d’indie-rock, van pasar pel escenariu improvisáu na grada de la cantina de La Cruz, Montefurado (22 horas), banda liderada por Marcos Montoto (Peralta) que presenta’l so primer discu ‘Heavy Heads’, y Tribute Against The Machine, que va facer sonar los temes de Rage Against The Machine cola mesma potencia que los miembros orixinales. Va poner el ramu a esta primer xornada unos vieyos conocíos, Ilustres Patilludos, que yá animaren les fiestes nel 2023.
El prau del campu de fútbol va alborecer con un enfoque mui distintu, cola pretensión de recuperar les vieyes romeríes d’antaño. A les 12.30 hores van tocar les Pandereteres de Ciares, pa siguir a les 13 hores cola llectura del pregón per parte de Juan Carlos Díaz, ún de les persones responsables de la vuelta de la Romería de Ciares nel 1965, y la entrega del Premiu Teyera Exemplar 2025 al Balonmano Gijón, club allugáu nel barriu que cumple 40 años. Rollu Folk va animar darréu’l vermú mientres se reparte’l bollu y la botella de sidra a los socios. Les families y grupos d’amigos van poder participar depués nuna xinta popular cola comida que traigan de casa y na que la sidrería ‘El Alleranu de Fito’ va cocinar el pulpu.
Yá pela tarde va haber espaciu pa los xuegos infantiles gracies a El Telar y los presentes van poder deprender baille asturianu nun taller de baldre que va ser mui útil pa lo que queda de folixa, primero con La Bandina los Muiles, que dende les 19 hores, van animar al baille. A les 20 hores van entamar les actuaciones, primero con 6 Riales y depués con Mediarea (22 hores), pa dar pasu depués al mecigayuska de La Tarrancha (00 hores). Por último, un DJ va animar la fiesta hasta’l pieslle.
Les Fiestes Populares de Ciares cuenten col sofitu de la Fundación Caja Rural de Gijón, l’UC Ceares y miGijón, que va patrocinar los vasos reutilizables de la celebración.
Sestaferia y pa Granda
Los vecinos tán convocaos el domingu a les 17 hores pa una sestaferia pa recoyer los restos de les fiestes y dexar el campu de fútbol como taba enantes de los festexos. Depués van tirar pa la parroquia vecina de Granda, que celebra Santana y entama pa esi día la XVI Nueche Celta cola partipación de Trebeyu, Herbamora, Pandereteros d’Anguañu y los irlandeses Beeswing.
