«Nun se debate la necesidá de promocionar l’asturianu, sinón el procedimientu», espresa la Xunta pola Defensa de la Llingua Asturiana (XDLA) con respeuto al fallu, que va recurrir l’Ayuntamientu; Iniciativa pol Asturianu solicita al gobiernu municipal «la retramitación del documentu»
El Xulgáu Contenciosu Alministrativu númberu 1 de Gijón anuló’l Plan de Normalización Llingüística 2024-2027 «por nun ser el mesmu conforme a Derechu», en referencia al alcuerdu plenariu que lu aprobaba, llueu d’un recursu presentáu por Vox por «vicios de nulidá», esto ye, errores nel so procedimientu. En concreto, la falta d’informe económico, la omisión del procedimientu llegalmente establecíu por falta de consulta pública previa, la falta de espublización del testu nel portal web, de publicación de les memories y informes que conformen los espedientes d’ellaboración de los testos normativos, la falta d’intervención de la Xunta de Gobiernu llocal, el pasu direutu del proyeutu informáu pol Conseyu Asesor a l’aprobación y la so non inclusión nel Plan Anual Normativu.
L’Ayuntamientu anunció a les poques hores de que la única edil de Vox, Sara Concepción Álvarez Rouco, fixera pública la sentencia, que diba recurrir la mesma al Tribunal Superior de Xusticia d’Asturies (TSXA). Iniciativa pol Asturianu solicita, pela so parte, al gobiernu municipal «la retramitación del documentu con toles garantíes técniques y llegales pa siguir avanzando na normalización social del idioma». Llueu de recordar que Vox foi l’únicu partíu n’oponese nel Plenu a l’aprobación del testu, esta organización rescampla que la resolución «nun entra nel conteníu del Plan de Normalización Llingüística de Xixón y únicamente fai referencia a cuestiones técniques y de procedimientu».
Coincide esta llectura cola que fai la Xunta pola Defensa de la Llingua Asturiana (XDLA): «Acullá de lo que digan los hooligans de la intolerancia que punxeron el recursu, la sentencia esplica que nun se debate la necesidá de promocionar l’asturianu, sinón el procedimientu». «La estrema derecha celebra un error de la derecha como si fora un trunfu de la so cruzada contra la diversidá y la llibertá llingüística. El reconocimientu de la protección del asturianu tien qu’avanzar. La llucha pola oficialidá ye imparable. Otra razón pa venir a la manifestación del sábadu», añaden en referencia a la convocatoria de mañana pa reclamar la reconocencia de los derechos llingüísticos de los falantes d’asturianu y gallego-asturiano con motivu del Día de les Lletres Asturianes, que se celebra güei.
«Supón un nuevu ataque a los drechos de los falantes y la llibertá d’usu del asturianu, amás d’un intentu de bloquiar les polítiques de normalización del idioma», añade Iniciativa pol Asturianu, que recuerda que «la única garantía llegal pa defender los drechos de los falantes d’asturianu y d’eonaviego ye la oficialidá», polo qu’anima «a tola ciudadanía a participar na manifestación d’esti sábadu n’Uviéu» qu’entama la XDLA.
