Un grupu de venti profesores de l’Asociación de Docentes d’Asturianu y Eonaviego/Gallego-asturiano (ADAE) y representantes de sindicatos van pasar la nueche nel centru xixonés, «exemplu de matriculación», pa dar visibilidá a la so situación
El calendariu de movilizaciones de l’Asociación de Docentes d’Asturianu y Eonaviego/Gallego-asturiano (ADAE), dientru d’un plan d’aición más ampliu yá en marcha, entama esta tarde con un zarru en el CP Cabueñes énte’l bloquéu que vive la creación de la especialidá docente. Una ventena de miembros d’esti coleutivu y representantes del Sindicatu Unitariu Autónomu de Trabayadores de la Enseñanza d’Asturies (SUATEA), Comisiones Obreres (CCOO) Enseñanza y la Unión Xeneral de Trabayadores (UXT) van pasar la nueche nesti centru de la zona rural de Xixón «pa protestar pola nuestra situación llaboral énte la lentitú cola que’l Gobiernu asturianu ta faciendo les xestiones pa que’l Ministeriu d’Educación faiga los cambios precisos pa consiguir les nuestres especialidaes».
«Nun se ta tomando l’asuntu cola urxencia que creemos que se merez», apunta Claudia Menéndez, presidenta del coleutivu. «Sabemos que la decisión final ta en Madrid, pero tamién que’l Gobiernu asturianu tien cierta responsabilidá y que ye la Conseyería d’Educación la que tien que liderar esta reivindicación que yá va pa 40 años», añade. Sobre’l compromisu dau en xineru pola conseyera Eva Ledo d’insistir cola especialidá docente a la ministra nueva del ramu, Milagros Tolón, entovía nun tienen novedá nenguna. «Tampoco nun hebo solicitú formal nenguna de modificación de los reales decretos, como sí fixo’l Gobiernu esta selmana tovía col Güerna. Nun creemos que se tean dandos los pasos oportunos», asegura.
D’igual forma, «tampoco nun sabemos en qué se basa’l ministeriu pa negar la modificación de los reales decretos. Lo que nun entendemos ye que si tu vas ellí a pidir una modificación y te dicen que non, tendrán qu’argumentate por qué non; nun pues conformate con un ‘nun ye posible y yá ta’», apunta Menéndez, que sobre la habitual escusa de los últimos años de la falta d’oficialidá especifica que «ye l’argumentu pa nun poder facer la especialidá como tán agora redautaos los reales decretos, pero pueden camudase. Amás, los reales decretos nun esixen tramitación parllamentaria, valdría col preste del Conseyu de Ministru faciendo’l so respeutivu trámite. Ye una cosa mui ordinaria y namái lu torga la falta de voluntá política».
L’ausencia de la especialidá nos reales decretos ye una cuestión qu’afeuta a los 330 maestros de Llingua Asturiana y Gallego-asturiano del sistema educativu. «Nun podemos opositar y trabayamos como interines; nun podemos acceder a la plaza. Contrario a lo que pue pensar la xente de que queremos la estabilización pola cara o ciertos privilexos, lo que queremos ye opositar como’l restu y tener les mesmes condiciones”, esplica Menéndez, que recuerda tamién que la situación acutal «contravién tamién la normativa europea d’abusu de la temporalidá».
La escoyeta del Cabueñes pa esti zarru ta «na estabilidá que tien la materia ellí con una profesora que lleva más de cinco años siguíos», daqué esceicional con sistema actual, «lo qu’ayuda, ente otres coses, a que la matrícula supere’l 60 %”. Con una docente a xornada completa y otra a media, «esti colexu ye un exemplu de matriculación», apunta Menéndez, que nun descarta nun futuru próximu, nel casu de nun camudar la situación, «entamar la primer fuelga de maestros de Llingua Asturiana y Gallego-asturiano». Tampoco nun se descarta «movilizaciones a nivel estatal, desplazanos a Madrid».
Cierto, no merece ninguna urgencia. Con la cantidad de necesidades básicas que hay sin cubrir, que se dedique unsólo segundo a esto es obsceno, sólo por unos vividores que quieren literalmente vivir del cuento. Que contraten más médicos en su lugar.