Nos primeros díes de Selmana Santa van desplazase a la capital del Estáu pa visibilizar la so situación llaboral y reclamar la creación de la especialidá docente, aición concretada por ADAE esta madrugada nel zarru entamáu por una ventena de maestres y maestros nel xixonés CP Cabueñes
Sacu de durmir en mano, a les 17.30 hores entamaron a llegar al xixonés CP Cabueñes los primeros maestros y maestres de Llingua Asturiana y Gallego-asturiano. El motivu yera’l zarru convocáu pola Asociación de Docentes d’Asturianu y Eonaviego/Gallego-asturiano (ADAE) pa visibilizar la so situación llaboral y denunciar la lentitú cola que, consideren, el Gobiernu asturianu ta llevando les xestiones col Ministeriu d’Educación, Formación Profesional y Deportes pa la creación de la especialidá docente. Ehí fadríen nueche una ventena de persones pa, a les 7 hores, salir del centru p’acudir a los propios a cumplir cola so xornada llaboral.
La so presidenta, Claudia Menéndez, valora de forma positiva esta primer movilización, que forma parte d’un plan d’aición más ampliu yá en marcha. En primer llugar pola repercusión mediática algamada, pero tamién polos sofitos recibíos de formaciones polítiques como Izquierda Xunida (IX), Podemos o Aína, y asociaciones como Iniciativa pol Asturianu, amás de los sindicatos Comisiones Obreres (CCOO) Enseñanza y Sindicatu Unitariu Autónomu de Trabayadores de la Enseñanza d’Asturies (SUATEA) y otros docentes «que tán siendo conscientes de les nueses reivindicaciones». «Valiónos tamién pa xuntanos, reflexonar y organizar próximes aiciones», señala esta maestra d’asturianu. La siguiente será en Madrid, el llunes o martes de Selmana Santa, y consistirá, previsiblemente, nuna visita al ministeriu pa entregar un escritu y nuna concentración frente al Congresu.
«Vamos siguir coles movilizaciones hasta que se tomen esti tema d’una vez y tengamos información de que la conseyera d’Educación solicitara una xunta cola ministra; o qu’hubiera una solicitú formal pa la modificación de los reales decretos pa crear la especialidá», asegura Menéndez. Los docentes nun descarten inclusive la convocatoria d’una fuelga.
