‘Perendi’ ye la última ganadora del Premiu Nel Amaro de Teatru Profesional en Llingua Asturiana o Gallego-asturiano, la primera con La Compañía del Alba del actor y narrador, qu’entantes yá llevara’l gallardón en solitariu nel 2017, na primer edición, con ‘Llázaro de Tormes’ y nel 2022 con ‘Les madreñes vacíes’
Foi nel añu 2017 cuando la entós Conseyería d’Educación y Cultura, con Genaro Alonso al frente y con Fernando Padilla a cargu de la Direció Xeneral de Planificación Llingüística y Normalización, decidía convocar un premiu pa potenciar la creación dramática n’asturianu, el primeru d’artes escéniques nun momentu nel que yá taben consolidaos cinco Premios Lliterarios y el del Meyor Cantar. Llevaría’l nome de Nel Amaro, el polifacéticu artista turonés que nos dexaba nel 2011, y contaría como primera obra ganadora ‘Llázaro de Tormes’, de Carlos Alba, actor y narrador que nes siete siguientes ediciones llevaría dos más: nel 2022 con ‘Les madreñes vacíes’ y nel 2024 con ‘Perendi’, esta última con La Compañía del Alba, proyeutu personal col que «intenta llevar la pallabra escénica al máximu nivel d’espresividá».
«El fechu de que se convocare’l premiu yá foi mui importante, porque había premios pa otros apartaos lliterarios, y que se fixera ún asina pa dalgo puramente escénicu tuvo mui bien. Ye un estímulu pa compañíes que nun tan avezaes a trabayar n’asturianu», valora Alba, qu’añade que’l gallardón «nos primeros años non, pero agora sí lleva consigo igual 10 o 12 funciones al añu siguiente, que tán mui bien». «Añu a añu va teniendo más repercusión y más interés per parte de les compañíes teatrales, y creo que per parte del públicu tamién; hai más espíritu críticu, de comparar una obra con otra y coles d’otros años», añade. Esti ochobre ta celebrándose la fase de festival del Nel Amaro, nel que los cuatro finalistes muestren les sos creaciones a aficionaos y xuráu nel uvieín Teatru Filarmónica, que se va pesllar el vienres 31 cola representación de ‘Perendi’ a les 20 hores.
«Ye una adaptación de dellos rellatos que publicó Milio Rodríguez Cueto, que tuvo una década sacando un cuentu selmanal en ‘La Nueva España’ n’asturianu, y son testos sobre los que yo siempre quixi facer daqué», apunta Alba, que comenta que «nel 2022 tuvi diendo per seis meses a Madrid al Teatro de La Abadía pa facer un cursu de más especialización dientro del teatru y xustó nesi procesu sentí la necesidá de montar dalgo. Por fin fui quien a ver cómo se podíen facer esos testos que llevaben años seleicionaos». «De mano diben ser una serie de monólogos, pero como Milio entró mui bien al proyeutu, propunxi-y escribir escenes. Asina, la metá del espectáculu son los rellatos, que tán fechos monólogos, y la otra metá ta escrita por Milio dafechu pa la obra. Foi un proyeutu que foi medrando gracies al autor», rellata sobre esta comedia con toques costumistes y de novela prieta.
Cellero y el monólogu asturianu
Alba, llicenciáu en Periodismu, tuvo’l so primer contautu col teatru en Madrid mientres la so etapa universitaria. «Enganchóme y cuando acabé Periodismu yá me metí nuna escuela d’interpretación, d’arte dramáticu», recuerda. Paralelamente al teatru, «descubrí tamién la narración oral, contar cuentos. Nos años 90 en Madrid taben un poco de moda non sólo pa neños, sinón p’adultos, y foi como dos caminos paralelos: el teatru y contar cuentos p’adultos. A partir d’ello fui poco a poco averándome a la tradición oral, a facer coses n’asturianu yá cuando empecé a volver p’Asturies. Y cola xunión de los dos mundos foi cuando entamé a facer el personaxe de Cellero y a recuperar el monólogu asturianu».
Destaca que «el monólogu asturianu tien munchu componente narrativu, que ye lo que nos distingue de ‘El Club de la Comedia’. Tien humor puru y duru, tipu chistes o xuegos de pallabres, pero lo más potente del monólogu ye cuando cuentes una historia en versu. Ye la historia, anque sía graciosa, pero hai una historia». El primeru col personaxe de Cellero, basáu nel so bisagüelu, fíxolo nel 99, cuando torna a Asturies y comienza a dedicase profesionalmente al teatru, y darréu incorporó otros d’actualidá, monólogos que-y dieron popularidá n’Asturies. «La Compañía del Alba naz de que colos años siento la necesidá de facer montaxes con otros autores. Yá fixera dalguna prueba, como con Maxi Compán de Fe de Ratas, y nel añu 2022, sobre manera cuando realicé’l cursu en Madrid, vi la necesidá d’empezar a funcionar como compañía», esplica. Agora, en La Compañía del Alba tán «tolos espectáculos nos qu’actuó yo en solitariu y el montaxe de ‘Perendi’ nel que yá somos tres actores y yá ye un trabayu de compañía más estándar».
Nesti puntu rememora que ‘Llázaro de Tormes’, primera obra que-y dio’l Premiu Nel Amaro de Teatru Profesional en Llingua Asturiana o Gallego-asturiano «foi’l primer montaxe teatral más seriu que fixi, anque nun me llamara La Compañía del Alba y tuviera yo solu». «Intentamos cuidar del nivel lliterariu de les obres, coneutar un poco cuando se puede colo clásico, pero tamién cola actualidá. Pue parecer difícil, pero gústanos muncho combinar lo clásico y l’actualidá», apunta sobre la so compañía, qu’estrena toles obres n’asturianu porque «los testos que m’interesen, como nel casu de ‘Perendi’, tán n’asturianu l’orixinal, entós ye como una consecuencia d’ello. Y porque n’asturianu hai toa una tradición escénica que me presta y una forma de trabayar cola llingua que me presta tamién muncho, que nun torga pa nada el facer coses en castellanu depués».
‘Animalada Xabaz’
Na so trayeutoria, Alba tamién tuvo presencia na televisón, nos programes ‘Al platu vendrás’, onde fixo de Pelayo —«yera actor puru y duru; nun facía yo los guiones, como pasa colos monólogos»—, y más recién en ‘Animalada Xabaz’, con Covenant Audiovisuales, del que se grabaron dos temporaes. «Foi una esperiencia mui guapa porque siguí trabayando cola tradición oral con cuentos, pero depués tamién amplié, porque propunxi a Maxi Compán el facer rock pa neños y desarrollar un personaxe al respeuto. Trabayamos tamién colos títeres; ye un programa de tele mui teatral, nel bon sentíu», esplica.
Son los títeres, colos que ganó nel 2022 el Nel Amaro con ‘Les madreñes vacíes’, onde ta la mente d’Alba pa un futuru próximu. «Agora tamos centraos en ‘Perendi’ porque salieron bastantes funciones, pero pal añu qu’entra sí que me gustaría facer otra obra de títeres. Tengo tres nel repertoriu y llevo dellos años ensin estrenar nada d’esti calter. Tengo una idea pa desenvolver pa la edá de 3 a 6 años, pa edá infantil», avanza. De momento, guarden fecha, vienres 31, pa disfutar, con accesu de baldre, de la última obra merecedora del gallardón, una comedia «mui trabayada, que suena mui bien, con un asturianu mui cuidáu y al empar con muncha vinculación cola oralidá, con tola tradición de la lliteratura asturiana».
