Supón un aumentu del 1,2% con respeuto al cursu pasáu y ye la cifra más alta de los años últimos; la conseyera Lydia Espina treslladó a l’Academia de la Llingua Asturiana (ALLA) los avances previstos por Educación na promoción del asturianu y eonaviego
L’interés pola asignatura de Llingua Asturiana y Lliteratura —Eonaviego y Lliteratura nos conceyos del occidente— medró esti cursu últimu hasta’l puntu de rexistrar les meyores cifres de matriculación de los años últimos. Setiembre arrancó con 22.909 alumnos y alumnes estudiantes de les llingües propies en toles etapes educatives non universitaries, a los que s’incorporaron otros 31 a lo llargo d’esti primer trimestre, dexando’l total en 22.940. Esti aumentu ye del 1,2% en comparanza col periodu pasáu.
En Primaria, onde l’asturianu ye voluntariu, cola alternativa de Cultura Asturiana, matriculáronse al entamu del cursu 14.911 estudiantes na escuela pública y 2.201 na concertada. Mientres, en Secundaria y Bachilleratu, cuando la materia pasa a ser optativa, compitiendo con una segunda llingua estranxera y otres asignatures como ‘Digitalización Aplicada’, ‘Cultura Clásica’ o ‘Proyecto de Emprendimiento Social o Empresarial’, el total d’alumnos ye de 4.125 y 1.124, de manera respeutiva, na pública, y de 540 y 8 na concertada.
Lydia Espina, conseyera d’Educación, fixo públiques estes cifres nun alcuentru con Xosé Antón González Riaño, presidente de l’Academia de la Llingua Asturiana, na sede de la conseyería, cita na que tamién tuvo presente David Artime, direutor xeneral d’Inclusión Educativa y Ordenación. Na mesma presentó tamién los principales avances previstos pol so departamentu na promoción del asturianu y eonaviego, ente les que rescampla, pola so importancia, la incorporación el cursu viniente d’estos idiomes na segunda etapa de Infantil (3 a 6 años), una vieya demanda del sector educativu y de les organizaciones del movimientu de reivindicación llingüística. La so ufierta va ser obligatoria por parte de los centros, pero la so escoyeta, voluntaria pa les families.
La modificación del Decretu 56/2022, de 5 d’agostu, pol que se regula la ordenación y s’afita’l currículu d’Infantil, pa incluyir esti conteníu nel área de Comunicación y Representación de la Realidá cuenta yá con un borrador, que saldrá próximamente a información pública. La ufierta nueva va implantase de forma simultánea nos trés cursos del segundu ciclu d’Infantil y tendrá un mínimu de 3 y un máximu de 4 hores selmanales en tola etapa. Las sesiones serán, preferiblemente, de 30 o 45 minutos y los centros habrán fixar, polo menos, una clase a la selmana nel primer cursu pa les escolines y escolinos de 3 años. La incorporación del enseñu de les llingües propies nesti ciclu va llevar a la contratación de 100 docentes a xornada completa.
Tamién ta en marcha una propuesta de modificación del decretu que permita ufiertar asturianu dende’l cursu viniente nes Escueles Oficiales d’Idiomes. «Les persones interesaes podrán obtener la mesma certificación de Llingua Asturiana que se vien concediendo dende’l 2020 coles pruebes llibres, pero cola ventaya de qu’agora recibirán la formación necesaria p’algamala», apuntó Espina. En setiembre va tener llugar la convocatoria d’esti añu d’estes pruebes adaptaes al Marcu Común Européu de Referencia pa les Llingües, que repite con esámenes de los niveles básicu A2, intermediu B2 y avanzáu C1.
Méritu computable n’oposiciones
Nel apartáu d’oposiciones, la conseyería va incluyir l’asturianu y l’eonaviego como méritu computable nel accesu a la función docente. La estrena va ser nel próximu concursu-oposición pa reponer places de profesoráu de Secundaria y otros cuerpos. Per otru llau, Espina informó de la previsión d’ellaborar un documental o miniserie de videu-podcast pa conmemorar el cuarentenu aniversariu de la incorporación del idioma al sistema educativu nel cursu 84-85.
No que respeuta a distinciones, convocáronse per primer vegada los Premios Estraordinarios d’Asturianu y Eonaviego p’alumnos de Secundaria y Bachilleratu, na que participen 37 institutos, que se van entregar n’abril na gala xeneral. Por último, la conseyera recordó qu’esti cursu va crease’l sellu d’escelencia ‘Llume’, que se va conceder a centros educativos que desendolquen proyeutos d’innovación venceyaes col enseñanu de les llingües propies, y confirmó que dellos grupos de trabayu tán ellaborando materiales didáuticos para toles etapas educatives, sobre manera pa Infantil, baxo la coordinación de la Direición Xeneral d’Inclusión Educativa y Ordenación, ferramientes que van tar disponibles nel portal Educastur.
