La quinta edición d’esta iniciativa de la Fundación Municipal de Cultura, Educación y Universidá Popular entama’l llunes cola representación de la obra ‘Perendi’ de La Compañía del Alba; Ismael González Arias, Toli Morilla, Mapi Quintana o Sofía Castañón son dalgunos de los nomes de la programación serondiega
La seronda en Xixón llega siempre acompañada de lliteratura en llingua asturiana. Un añu más, y yá van cinco, la Fundación Municipal de Cultura, Educación y Universidá Popular presenta n’ochobre una amplia programación con propuestes interesantes y dalgunes de les novedaes últimes de la creación cultural n’asturianu en delles estayes. Falamos de ‘Ente Fueyes. Ochobre Lliterariu’, que va trayer a diferentes escenenarios de la ciudá música, poesía, novela, talleres, cuentacuentos y teatru.
El ciclu va entamar el llunes cola representación, en collaboración cola Conseyería de Cultura, Política Llingüística y Deporte al traviés del so programa ‘Autores en Camín’, de la obra ganadora del VIII Premiu Nel Amaro de Teatru Profesional en Llingua Asturiana o Gallego-asturiano, correspondiente al añu pasáu. Ye ‘Perendi’, de La Compañía del Alba’, una función dirixida por Carlos Alba ‘Cellero’, actor de la mesma xunto con Carmen Gloria y Cova Cobos, que se va poner n’escena’l llunes a les 18.30 hores nel salón d’actos del Centru Municipal Integráu d’El Llano, con entrada llibre, como toles actividaes d’Ente Fueyes a esceición d’un espectáculu nel Teatru Xovellanos.
Tamién participa n’Ente Fueyes el Mercáu Artesanu y Ecolóxicu de Xixón, que va tener llugar esti mes los díes 11, 12 y 13, cuando va celebrase’l Día de les Escritores. Asina, esi llunes el certame mensual va dedicar un espaciu pa un cuentacuentu de Sergio Buelga (18 hores) y talleres pa que la reciella conoza la figura de Xosefa Xovellanos (de 12 a 14 y de 17 a 19.30 hores), una de les escritores más relevantes de les lletres asturianes. Una actriz va ponese amás nel papel de la hermana del ilustráu y va percorrer el mercáu a les 13 hores pa falar sobre la so vida y obra, y la d’otres autores.
Al día siguiente, martes 14, la escritora Sofía Fernández Castañón, la música Sara Friera, la fotógrafa y realizadora audiovisual Daniela Cohen y la percusionista Jimena Menéndez presenten un espectáculu poético-visual de nome ‘Ser a quien a cantar’. Trátase de «una reflexón sobre la ocupación del espaciu públicu per parte de les muyeres», amás de «un homenaxe a la xenealoxía que foi abriendo camín pa toes», y va desenvolvese a les 19.30 hores na sala de conferencies del Centru de Cultura Antiguu Institutu. Mentes, el xueves 16, va poner un conciertu de La Bonturné, formación ganadora del XVI Premiu Camaretá al Meyor Cantar por ‘Odisea la nui’, a les 19.30 hores nel patiu del Antiguu Institutu.
Pieslle nel Xovellanos
Ente Fueyes va siguir la selmana siguiente con un alderique’l martes 21 baxo’l nome ‘Miraes de muyer na música asturiana’ a les 19 hores na sala de conferencies del Antiguu Institutu, eventu moderáu por Claudia González nel que van tomar parte les intérpretes Sandra Díaz, Mapi Quintana y Raquel Vega. Mentes, el miércoles 22, nel mesmu llugar y a la mesma hora dientro del programa ‘Autores en Camín’, Ismael María González Arias va presentar ‘Marcaes pol estigma (1664/1665)’, novela ganadora del XLV Premiu Xosefa Xovellanos.
Va pesllar l’ochobre lliterariu xixonés la propuesta ‘Nueche d’insomniu. L’espectáculu’, el vienres 31 nel Teatru Xovellanos a les 20.30 hores, cola música de Toli Morilla como protagonista. El públicu va atopar una rellatu curtiu, representáu pol actor Antón Caamaño a mou de monólogu interior, entellazas por 9 creaciones del cantante interpretaes en direuto en compañía del fagotista José Meren, con Gloria Caamaño, Arancha Cardedo y Sara Méndez. Ésta ye la única de les actividaes d’Ente Fueyes que ye de pagu, con entraes yá a la venta por 10 euros.
