Esti rostru conocíu pa gran parte de la población pola so presencia en TPA lleva una década de plena dedicación al enseñu d’estes tradiciones en dellos puntos del territoriu; «estos últimos años vi un cambiu bastante potente en cuanto a afluencia de públicu, por munchos motivos», apunta
Uviéu, Xixón, Villanueva, Nava… Son dalgunos de los llugares onde pon clase anguaño Pau Santirso, uvieín que lleva más de 20 años deprendiendo baille y pandereta, los 10 últimos yá con dedicación plena. Apunta que-y ye difícil calcular con cuántos alumnos cuenta esti cursu, pero la cifra supera los 400, una amuesa del tirón que ta teniendo la tradición nestos tiempos na sociedá asturiana. «La verdá ye que sí, ta en crecimientu», confiesa, «estos años vi un cambiu bastante potente en cuanto a afluencia de públicu, por muchos motivos».
A la hora d’enumeralos, cita en primer lugar a la «xente que nos dedicamos a ella, que lo enseñamos dende una perspeutiva amena y con riqueza cultural, tresmitiendo lo que sentimos». Darréu cita al «movimientu musical qu’hai con Rodrigo Cuevas, Tanxugueiras, Fillas de Cassandra, Mondra… Xente que garra la música tradición y da-y un aire actual, lo que fai que llegue al públicu», y, después, a les «fiestes, nueches en danza, folixes onde la xente ve a xente baillando asturiano y piensa ‘yo nun sé, voi deprender’». «Yo siempre digo en clase ‘de xuru que sabéis baillar reggaeton, cumbia, salsa, bachata y pasodoble; oyi, ¿una xotina asturiana, que ye lo nuestro?’. Siempre me dan la razón y muncha xente vien por eso, poles ganes de deprender lo nuestro».
Pa baillar nun fai falta «nada esceicional». «Tol mundu pue facelo ensin influyir la estatura, el pesu o la edá. Hai xente de 90 y de 6 años. Ye pa tolos públicos», esplica Santirso, que comenta que «esta selmana entamé les clases y lo primero que faigo ye dar una charra de toles coses positives que tien el baille. Una d’elles ye’l deporte, tamos hora y media baillando, entendiendo la música y el cuerpu, y faciendo tamién exerciciu. Sudamos como’l que va a clase de zumba o a un ximnasiu a ‘spinning’». Amás, apunta, «pues conocer Asturies al traviés del baille. Yo en clase pongo un mapa con tolos conceyos y voi diciendo ‘esti baille ye orixinal d’esti conceyu’. Que ye de Trabáu, de Degaña; o de Vidal, en Cangas’… Conoces Asturies al traviés del folclor, porque hai xente que nun sabe ónde ta Degaña». Tamién tien beneficios no que respeuta a «la coordinación. Deprendes a conocer el cuerpu. ‘Nun sé mover los pies a la vez que los brazos, a la vez que toco la castañuela, a la vez que tengo que sonrir’… El cerebro ta un poco oxidáu y hai que dir añadiendo elementos pal baille».
Dende los 16 años
Santirso entamó a baillar a los 16 años. «Siempre me gustó. Metíme en grupos de baille, daquella nun había escueles pa deprender; conocí a una persona, ésa llevóme a otra que me llevó a investigar, a rascar nesti mundu que m’encantaba. Tuvi 18 años trabayando n’otra profesión y con 36 años dixi yo ‘dexo esti trabayu que nun me fai feliz y voi intentar ser feliz dando clase de baille asturianu, de tolo que deprendi nesos años’. Entamé a dar clase con venti y dalgo, pero salía de de trabayar y diba a dar clase a los amigos por cuatro euros», rememora. Apunta que «sí ye verdá qu’hai poca xente que viva d’esto, pero sí un movimientu mui grande. Hai más demanda que profesionales. Recién llamáronme de Ḷḷuaca pa dar clase, pero tengo toles tardes ocupaes y nun me da tiempu a desplazame hasta allá», argumenta.
El so facer y conocimientu, yá bien conocíu na escena tradicional, saltó al gran públicu al traviés de la pantalla de TPA. «Grabé 44 programes con Anabel Santiago, fiximos les campanaes, y foi una maraviya porque yera’l mio mediu: falaba de folclor, baillaba, cantaba tocaba la pandereta, presentaba… Y diome un poco de visibilidá». Entiende Santirso que «contar el folclor d’una manera moderna o actual, o vistíu d’una forma guapa, diferente, abrió tamién un poco de campu, porque tenía munchísima audiencia. El folclor nun ye sólo pa la xente mayor o pa la xente de los pueblos; ayudó a abrir esa mente, esa brecha de públicu. Yo quiero tocar la pandereta asina de bien, voi a clase».
Clases nes que les muyeres siguen siendo mayoritaries. «Cada vez hai más paisanos, pero ye verdá como nel fútbol o nel tenis, hai menos muyeres», comenta l’uvieín. «Yo agora tengo munchos homes que vienen inclusive cola pareya, al entamu porque vien ella, pero col tiempu va facer el so grupu y a desenvolvese por sí mesmu. Pásase mui bien y tien el so aqueñ. L’otru día tuvi como a 40 na mesma clase tocando castañueles a la vez, baillando, sonriendo al traviés del folclor asturianu. Yo, que vivo d’esto, entovía m’impauta. Respígame», confiesa.
El cambiu con respeuto a nun va munchu tiempu ye la democratización del baille. «La época que yo viví yera esclusivamente de grupos zarraos de baille. Yo enseño a baillar y llueu caún fai lo que quiera. Enantes teníes que metete nun grupu y quedábase ehí, agora ta too muncho más abierto. Yo mesmamente garro una pandereta y voi a la plaza del Paragües y sentámonos a tocar y baillar siempre que nun molestemos, nun horariu normal. Quedar pa tocar, eso enantes nun se facía, quedábemos pa charrar o pa otra cosa», destaca.
Nueches en danza
Tamién hai espacios como les nueches en danza, iniciativa creada va más de diez años por Santirso y un piñu de persones que se movíen no tradicional nun momentu nel que «víamos que nos faltaba dalgo n’Asturies pa poder salida a lo que tamos deprendiendo y pasalo bien ente nosotros, cola nuestra música”, un conceutu «qu’en realidá nun ye nenguna invención d’agora. Antiguamente quedaben pa baillar nel pueblu». «Sí ye verdá que la primera foi un bombazu, la xente diba a velo y depués diba a clase p’apuntase. Agora ye una discoteca de música tradicional; méteste ellí a les 8 y sales a les 4 la mañana depués de baillar xotes, muñeires, valses, de tou», apunta sobre estes fiestes que s’entamen per diferentes pueblos aconceyando a decenes de persones pal baille. El meyor llugar p’ameyorar y poner en práutica lo deprendío en clase nun ambiente festivu.
Lo cierto ye que tanto’l baille como la pandereta, un instrumentu nel so tiempu minorizáu que se venceyaba principalmente a la muyer, tán en punxanza, con cada vez más xente interesao nellos. «Ta pasando dalgo que llega pa quedar», apunta Santirso, que cita como exemplu l’ emplegu de melodíes tradicionales con bases electróniques de Rodrigo Cuevas o Herbamora nel so trabayu últimu. Una bona noticia, ensin dulda, pa la cultura asturiana.
