Dellos ayuntamientos asturianos amuesen la so riqueza turística y cultural nesti puestu que cuenta con una programación qu’inclúi actividaes participatives y prebes, y prepara una propuesta especial pal Día de la Llingua Asturiana na FIDMA
El stand Conceyos con encantu convirtióse nún de los puntos más frecuentaos de la Feria Internacional de Muestres d’Asturies (FIDMA). Al frente tán Ovidio Rubio Vicente y Aida Iriarte Martínez, responsables del espaciu, que xunta a dellos conceyos del Principáu col oxetivu d’amosar la so riqueza turística y cultural.
«Tenemos dende Nava, Salas o Cabrales hasta Llanes», esplica Rubio. Los visitantes, señala, suelen interesase por rutes, naturaleza y gastronomía, «que ye bastante identitaria d’Asturies». Ente les consultes más habituales figuren les freses de Candamu, la Cueva de la Peña y, sobre manera, la zona de Llanes y les sos playes.
Iriarte confirma que Llanes espierta un gran atractivu, pero tamién hai públicu que s’avera con un oxetivu mui personal: «Bastantes persones vienen a buscar el so conceyu. Nun ye sólo visitar, sinón atopalu nel mapa y llevar información». Esta identificación llocal refléxase inclusive nes semeyes colos llamativos bocadillos decorativos del stand, como cuenta Rubio: «Güei vieno una pareya, él de Villayón y ella d’El Franco, y fíxi-yos semeyes colos bocadillos, qu’amás tán na mesma parte del mapa».
La programación del puestu nun se llenda a la información turística. Inclúi tamién actividaes participatives y prebes. Habrá demostraciones de cocina a cargu de distintos conceyos, visites d’alcaldes y propuestes tan singulares como la de Proaza, que recupera un quesu tradicional cuasi desaniciáu gracies a la iniciativa de dos vecines, que lu presentarán na Feria.
Amás, espérase la presencia de filanderes y, nel Día de la Llingua Asturiana, que va celebrase’l sábadu, una actividá pa que’l públicu asitie’l so conceyu nun gran mapa interautivu. L’usu del asturianu, presente en bona parte de les conversaciones, cuélase tamién na dinámica del puestu, onde nun falta l’humor y l’intercambiu de llingües ente espositores y visitantes.
Con un amiestu de tradición, identidá llocal y esperiencies sensoriales, Conceyos con encantu ye yá una parada obligada pal que quiera descubrir, o redescubrir, l’Asturies más cercana. El puestu entámalu la plataforma d’ociu y turismu VerAsturies y ta nel pabellón 3-4.
