¿Qué ye un mineru pa ti?

Asturies va camín de convertise na Florida española; tán poniéndose a conciencia les bases pa que lo faiga

Va unos años, un periódicu rexonal ufiertó a los sos llectores «El Parchís de Asturias», una versión ástur del xuegu de les fiches, los caxellos, los dados y los cubiletes. Yera un parchís a seis; podía escoyese ente esi númberu de colores, identificaos con otres tantes figures totémiques del país. Taba la xana, colos sos llargos pelos rubios. Taba l’asturiana, una muyer vistía col traxe rexonal. Había un escanciador. Había un osu. Un don Pelayo. Y, a lo último, un mineru: monu azul, cascu y una parafusa hidráulica na mano.

Unu que ta a puntu de cumplir trenta y ocho años crióse entá nuna Asturies na que los mineros y los obreros fabriles polo xeneral yeren la presencia brengosa qu’aquel xuegu y la so selección de figures quintaesenciales espresa. Los xixoneses de la mio edá criámosmos inda ente l’estrueldu y el fumu de les batalles campales de los trabayadores de los estelleros contra los antidisturbios desbordaos, nuna ciudá arrodiada de fábriques, que nel so skyline reinaben les grúes y chimenees y vivíase a golpe de fuelga y manifestación. A principios de los ochenta’l diariu ultraderechista El Alcázar llegó a dicir que Xixón yera «un banco de prueba de la estrategia revolucionaria». Y tou eso formaba parte, non solo del paisaxe visual de la ciudá, sinón de la so alma, de la so identidá autopercibida, imaxinada como un negativu esactu de la d’Uviéu, esi ximielgu espeyu de tamañu paecíu, pero traces opuestes, col qu’entós yera inevitable, obligatoria, sagrada la rivalidá. Uviéu yera interior; Xixón, costera y abierta al mar. Uviéu yera aristocrática; Xixón, obrera. Uviéu yera una ciudá universitaria y funcionarial; Xixón, industrial. Uviéu yera cerrada; Xixón, abierta. Uviéu yera de dereches y Xixón d’esquierdes. Uviéu yera vetusta y Xixón yera moderna. Uviéu yera franquista; Xixón, democrática. Uviéu tenía la ópera y Xixón, la Semana Negra.

Aquel foi, sí, el nuesu mundu, pero yá nun esiste, y nun lu conocieron les xeneraciones más nueves, de les qu’unu entrúgase qué ye un mineru pa elles, y si lu incluyiríen nun minipanteón de tótems de l’asturianidá que se-yos pidiera numberar. Ye abondo probable que non. La so Asturies ye otra, otres les pilastres de la so identidá: un polu turísticu, el Paraísu Natural, un llugar nel que se pasa podre y cómese curioso. Un llugar nel qu’atopar, non yá barricaes, sinón barrigaes. Hai dos cantares de Víctor Manuel qu’espresen nidio’l cambéu. Una, la célebre Asturias, la música que’l mierense punxera a los versos de Pedro Garfias y na qu’Asturies ta sola en metá de la tierra, xugando la vida nuna partida cada vez que tien ocasión, infundiendo coraxe a los obreros del mundu. Cantóse per primer vegada en 1976. La otra, llanzada en 2018, titúlase Allá arriba en el norte y los sos protagonistas y emponderamientos son bien otros: «Me cuenta el tejo que ha visto pasar/ ocho siglos en este lugar,/ la vaca pinta y su curiosidad/ y esa cara que es pura bondad/ y el pescador que se fue a enamorar/ de la bella sirena en el mar». Canta tamién Víctor: «Comen y cantan los de este lugar/ como si el mundo se fuera a acabar». Y tamién sal «La Regenta frente a su catedral». Pero nun salen los mineros. Y si yá nun son importantes pal ñetu del güelu Vítor y el bardu de la planta 14, ¿quién puede esperar que lo seyan pa un chaval de la xeneración Z?

Nuna Asturies que los sos templos yá nun son los castilletes esbadallaos, sinón los restoranes de Tierrastur y les fiestes de prau, la rivalidá Xixón/Uviéu nun puede más que desdibuxase, como de fechu yá ta faciendo. Pervive, pero nuna forma debilitada, que yá nun tien aires de combate cosmogónicu ente dioses alversarios, sinón d’una piquilla amable, circunscrita al fútbol y a graciosaes sobro la sablera qu’unos tienen y otros non. Les dos ciudaes cada vez se paecen más, o cada vez s’estremen menos. Asturies va camín de convertise na Florida española; tán poniéndose a conciencia les bases pa que lo faiga. Y seique dientro de trenta años l’Asturias roja, eso qu’un día foi un pleonasmu, acabe por volvese un oxímoron; daqué tan estraño d’imaxinase como güei lo ye —pero nun lo yera hasta mediaos de los noventa— una Murcia d’esquierdes. Nel parchís de la hestoria non siempres ganen los mesmos.