La Xunta pola Defensa de la Llingua Asturiana (XDLA) prepara pal 2 de mayu ‘Universu Damián’, un eventu na so alcordanza «fechu por xente que queríemos a Damián» nel que van tomar parte diferentes artistes asturianos
«Vamos recordalu a la so manera: con toles coses qu’a él-y gustaben y sobre les qu’escribía y pa les que militaba», adelanta la Xunta pola Defensa de la Llingua Asturiana (XDLA) sobre l’eventu que ta preparando n’alcordanza de Damián Barreiro, miembru activu d’esti coleutivu y periodista de referencia nel entornu cultural asturianu que finó en febreru a los 40 años. Asina, pel escenariu de la Casa de la Cultura d’Avilés van pasar el vienres 2 de mayu, dende les 19.30 hores, artistes y collacios n’homenaxe a la so figura.
Ente los nomes anunciaos pol coleutivu de reivindicación llingüística tán Rodrigo Cuevas, Beatriz del Grupo Beatriz, Mariluz Cristóbal Caunedo, el gaiteru Llorián García, Algaire y Fruela 757. También l’actriz Natalia Suárez Ríos. «Va haber alcordances, amigos y amigues… Y música en directo», adelanta la XDLA. La entrada va ser llibre hasta completar aforu.
