L’artista uvieín trai l’universu del espacio conducíu en TVE en 1978 por Lauren Postigo, con Rossy de Palma cumpliendo la función del andaluz, al Llagar Cortina nun videoclip de 17 minutos; un pasudoble nel que collabora Ana Belén, un tema electrónicu n’asturianu y otru tecnopop son les sos propuestes
Tornó a facelo. Rodrigo Cuevas nun apara de sorprender con cada propuesta nueva y ayeri esllumó cola estrena nes plataformes dixitales de ‘Llagares’, un proyeutu que ye un amiestu ente curtiumetraxe y triple videoclip qu’homenaxa al históricu programa ‘Cantares’ de Lauren Postigo dedicáu a la copla y que sirve de presentación de trés temes nuevos del que va ser el so discu próximu, ‘Manual de belleza’: el pasudoble ‘Sácame a bailar’, la pieza electrónica ‘Asturcón’ y l’ochenteru ‘Una muerte ideal’.
Entama’l mesmu con imáxenes de públicu sentáu en meses nel Llagar Cortina a la espera d’una actuación, a lo que sigue l’apaición de Rossy de Palma que, como facia Postigo naquel programa de TVE en 1978, introducía al artista, nesti casu Cuevas, cola sorna habitual que caltienen les propuestes del uvieín. Nesi momentu sal a escena’l cantante pa interpretar el pasudoble, colos espectadores de pie baillando, que fina con unes estrofes d’Ana Belén, non presente na grabación.
Una entrevista de De Palma y un videu nel mercáu de L’Infiestu con entrugues a piloñeses sobre Cuevas, residente nel conceyu, sirven d’enllaz a ‘Asturcón’, un cantar n’asturianu normativu con base electrónica. Esti tramu del ‘programa’ muestra imáxenes de l’actuación intercalaes con escenes grabaes que lu presenten como bandoleru, nuna historia al llombu del caballu autóctonu nel que nun falten los desnudos.
El tercer tema, llueu d’otru alcuentru del uvieín cola actriz balear d’ascendencia asturiana, ye ‘Una muerte ideal’, con soníu tecnopop, un chisgu a Tino Casal y lletra que combina l’asturianu, el castellanu, el gallegu y el llatín, mui baillable y con sorpresa pal públicu presente na actuación del videoclip. Pa finar, la despidida de De Palma y imáxenes costumistes xunto colos creitos que convierten a esti ‘Llagares’, dirixíu por Jorge Rojas, nuna obra pa recordar.
