La sidrería La Montera Picona de Ramón acoyó la primer fase d’esti concursu que valora la producción d’esti añu de sidra nuevo, ensin trasegar, pa escoyer la que va ser sidra oficial de la gran espicha de Selmana Santa qu’esti añu va tener llugar nel Recintu Ferial Luis Adaro
Cola espectación habitual, desendolcóse na mañana d’ayeri la primer fase del concursu XV Meyor Primer Sidre l’Añu. El xuráu, compuestu por seis espertos, con Manuel G. Busto y Joaquín Fernández al frente, entrambos tastiadores de renombre nel mundiu, valoró la sidra de diferentes llagares presentaos a concursu con una preba a ciegues que dio como finalistes a seis llagares. Éstos son Germán (Avilés), Cabueñes (Xixón), Huerces (Xixón), Viuda de Angelón con Prau Monga (Nava), La Morena (Siero) y Piñera (Xixón).
La gran final, de la que saldrá la sidra oficial de la Primer Sidre l’Añu del 2025, va tener llugar na mesma sidrería xixonesa’l miércoles a les 18.30 hores. El sistema va ser tamién de tastia a ciegues a doble ronda, siempre abierta al públicu y cola presencia de los llagareros participantes. El primer premio va consistir na merca de 1.000 euros del productu pa la espicha, mientres que’l segundu y tercer clasificáu va llevar tamién un reconocimientu. Los presentes van poder prebar la sidra participante a la finalización del concursu.
Fundación Asturies XXI ye la organizadora tanto del concursu como de la Primer Sidre l’Añu, la gran espicha de Selmana Santa, que nesta ocasión va treslladase al Recintu Ferial Luis Adaro del 17 al 20 de abril. Con esta iniciativa, yá consolidada, preténdese recuperar esta celebraciones al rodiu d’esta bébora, tradicionales nesta fecha del añu, y la ellaboración de sidra nuevo, ensin trasegar, práuticamente desaniciada del mercáu pola industrialización de los llagares.
