«Depués vendrán les tormentes, les lluvies de verdá, les nueches más fríes. Pero, de momentu, entovía ye branu, y la vida ye más fácil»
Paez que les coses van, pali pali, hacia la normalidá. Si ún camina per Xixón, verá terraces enllenes de xente disfrutando de tintos de branu y cañones de cerveza, charres entreteníes y paragües colingando de les sielles nos díes que’l sol eslluma con fuercia porque nun hai nada más normal qu’un clima alloriáu como’l de nueso. Los turistes lleven zamarra porque escoyeron venir al Paraísu a ello, a nun saber si podrán pisar la playa y tener que conformase col restu —que ye muncho— d’esti requexu perdíu tres un cordal que mos separa del restu d’España. Y anque les coses tomen el camín natural, ente rises y confidencies puedes oyer a los amigos falar sobre la cita pa poner la vacuna, y ye que nesti sen tamos mui aventaos. Ún, que ta inmunizáu dende hai mediu añu por mor del so trabayu, siéntese raru ente feches y llamaes al robot esi que te da la cita, pero nota la emoción nos güeyos de los collacios, que nagüen por tener defenses escontra’l virus que tantu tiempu mos fixo perder.
La xente quier volver a la vida normal. El fechu de poder quitar la mázcara pela cai —gracies a dios— ye un primer gran pasu; agora toca que mos concienciemos de verdá en qu’esta enfermedá tresmítese pel aire y que nun fai falta echar xel nes manes cada trés minutos nin esfregar los pies en felpudos máxicos más típicos de la Feria de Muestres que d’una tienda de productos sanitarios. Toca siguir tirando de prudencia y usar la mázcara onde de verdá toca, nos espacios cerraos, dientro los llocales, y ellí onde tea de bote en bote. Y cumplir les normes si tenemos signos de que podamos tar infestaos. Con suerte, pal añu que vien o dientro de dos, esta enfermedá algamará’l status d’endemia y será prima hermana del gripe; quiciabes tendremos de vacunanos añalmente pa recorda-y al cuerpu que’l bichu sigue perhí, pero nun tendremos de sufrir nin confinamientos nin normes estrictes; y al igual que pasa con otros virus respiratorios, habrá quien nun pueda contalo, pero serán, por suerte, casos aisllaos.
Pasío per Fomentu y veo les bicicletes —que son pal branu— esquivando turistes, guajes corriendo d’un llau a otru, families al sol. El corazón del branu llate con ilusión en nosotros. Depués vendrán les tormentes, les lluvies de verdá, les nueches más fríes. Pero, de momentu, entovía ye branu, y la vida ye más fácil.
