El retrasu na aprobación de la prometida norma autonómica lleva a coleutivos LGTBIAQ+ a la movilización, col sofitu d’una parte importante del texíu social asturianu, baxo’l lema ‘¡Vergoña! 20 años dempués: ¡¡Asturies ensin llei LGTBI+!!’
Ye la temática escoyida pa les actividaes del Arguyu d’esti añu, pero tamién el motivu de la movilización que ta convocada pa esti llunes a les 19.30 hores na uviedina Escandalera: ‘¡Vergoña! 20 años dempués: ¡¡Asturies ensin llei LGTBI+!!’, un lema que dexa bien nidio’l descontentu del coleutivu pol retrasu na aprobación de la tan anunciada norma autonómica. La previsión ye que’l Conseyu de Gobiernu dea lluz verde al so anteproyeutu nel segundu semestre d’esti añu, pa entamar darréu cola so tramitación na Xunta Xeneral, pero Xente LGTBI+ Astur (XEGA), XEGA Families y Liga de la Diversidad nun se fíen y quieren amosar, xunto col sofitu de bona parte del texíu social asturianu, la demanda y necesidá d’esta ferramienta «que blinde los derechos de las personas LGTBIAQ+ n’Asturies».
«Munchos foron los borradores, discutinios, los malos momentos p’probar esta llei… Tamos fartxs d’esperar y por ello esixiremos la so aprobación pa reivindicar los nuesos derechos. El Principáu nun pue retrasar más la so aprobación», demanda XEGA, que recuerda que, xunto a Castilla y Lleón, Asturies ye la única comunidá ensin dicha norma autonómica. «Los derechos han garantizarse a tola ciudadanía y non en función del territoriu o de les resistencies políticas qu’atopen pa la so aprobación. Los derechos humanos nun se discuten», reclama.
Los trés coleutivos convocantes cuenten pa esta concentración col sofitu de sindicatos, como CCOO, UXT o CSI; coleutivos LGTBI+, de mocedá o feministes; entidaes deportives, como l’UC Ceares o’l Gijón Fútbol Femenino; o grupos de comunicación alternativos, como Radio Kras.
