La escritora y responsable dende 2012 xunto con Samuel Castro de la histórica editorial vien recibiendo delles amueses de respetu y ciñu esta selmana con motivu del so retiru llaboral, que foi efeutivu esti miércoles
«Llamáronme de l’asesoría pa firmar unos papeles y cuando llegué a la llibrería atopé a tola xente», rellata Esther Prieto, escritora y editora que na tarde del xueves recibió un reconocimientu per parte de persones venceyaes a Trabe a lo llargo de la historia, escritores, familia y collacios na llibrería de la editorial, asitiada n’Uviéu, con motivu de la so xubilación. Samuel Castro y Rafael Rodríguez Valdés, que queden al frente de la empresa —col sofitu de la trabayadora Xana Suárez— que Prieto y Castro garraron nel 2012 al dexar la propiedá Inaciu Iglesias, foron los organizadores d’esta xuntanza íntima. «Ver a tanta xente y que te faigan un reconocimientu, claro qu’emociona», confiesa l’autora.
Enantes d’esta sorpresa, Prieto yá sientiera’l respetu y ciñu del sector na Feria de la Edición Asturiana (FEA) del Gremiu d’Editores d’Asturies, celebrada la fin de selmana pasada en Xixón, y tuviera una despidida’l mesmu día de la so xubilación, el miércoles, per parte de Castro y Rodríguez Valdés. D’ehí que nun s’esperara nada pal xueves la ganadora del Teodoro Cuesta de poesía y primer muyer en llevar, nel 2001, el Premiu Xosefa Xovellanos de novela gracies a ‘Güelu Ismail’, obra traducida al gallegu, amás de coatura de dellos llibros infantiles.
Nel actu convocáu na llibrería tuvieron presentes Antón García, fundador de Trabe nel 1992 y actual direutor xeneral d’Acción Cultural y Normalización Llingüística, y Inaciu Iglesias, propietariu ente 2007 y 2012, que tomaron la pallabra xunto a los responsables actuales y a la propia Prieto. Tamién acudieron extrabayadores, compañeros del sector, familia y collacios. Nesti grupu últimu inclúinse munchos de los autores qu’espublizaron con Trabe nestos 36 años de vida, en toles époques, como Severino Antuña, Ismael González Arias, Xulio Viejo, Milio’l del Nido, Lourdes Álvarez, Marta Mori, Inaciu Galán, Ángeles Carbajal, Xulio Arbesú, Xuan Santori, Xosé Miguel Suárez Fernández ‘Tapia’, Ramón d’Andrés, María Esther García López o l’actual conseyera de Cultura, Política Llingüística y Deporte, Ana Vanessa Gutiérrez, qu’acudió a mou personal, ente otros munchos grandes nomes de les lletres asturianes.
Dalgunos d’ellos animáronse tamién a dicir unes pallabres a Prieto, que recibió dellos detalles. El más destacáu, una edición non venal de cuentos de la escritora, antoloxía de la que s’encargaron Castro y Rodríguez Valdés depués de recuperar publicaciones de so en diferentes obres o revistes. Entregáronse exemplares a los presentes y un piñu d’ellos a l’autora, a la que se-y insistió qu’aprovechara’l tiempu ganáu al llabor profesional como editora a la creación lliteraria. L’actu peslló con un pinchéu nel llugar y conversaciones ente los asistentes.
