Los platos y los postres típicos de la época, como’l picadiellu, los frixuelos o les picatostes, presidieron les meses de los restoranes xixoneses, enllenos de muyeres en xuntanza pa disfrutar d’esta tradición con tantu raigón en Xixón; esti vienres ye la llectura del pregón y l’amazcaramientu de Pelayo
Yá entamó. Xixón disfruta del Antroxu, que na so versión más moderna entama col Xueves de Comadres, una folixa con munchu raigón na ciudá qu’ayudaron a caltener les Cigarreres de la Fábrica de Tabacos de Cimavilla. Güei son munches les muyeres que se xunten pa comadrar, principalmente pa cenar, anque tamién pa merendar, como yera tradicional, alredor d’una mesa onde nun falten los platos y postres típicos d’estes feches, como’l picadiellu, los frixuelos, les picatostes o les casadielles.
Los restoranes del conceyu tuvieron animaos anueche gracies a les munches collacies y familiares que mantienen esta costume. Munchos d’ellos ufrieron tamién baille nel propiu establecimientu, que s’allargó hasta bien entrada la madrugada, mientres que les más moces optaron por averase a llocales d’ociu nochernigu a siguir cola folixa depués de cenar. Too ello nel bon ambiente que contaxa l’Antroxu a los xixoneses y asturianos.
La celebración sigue güei col pasucáis charangueru, con salida a les 19 hores de Begoña contra la Plaza Mayor, onde tendrá llugar la llectura del pregón a les 20 hores, del que va encargase Higiénico Papel Teatro col nome de ‘Horariu d’iviernu, horariu de branu’. Darréu, les charangues van averase a la plaza’l Marques, onde se va amazcaritar a Pelayo, vezu que nunca falta nel Antroxu xixonés.
Reconocimientos de la Tertulia Feminista Les Comadres
Marisa Valle Roso, na categoría de Artes; María Ángeles Durán, na de Ciencia e Investigación; el Telacable Gijón Solimar, en Deportes; y María Pozo ‘Barbijaputa’, en Divulgación, recibieron les ‘Comadres de Oro’ qu’entrega la Tertulia Feminista Les Comadres, coincidiendo col Xueves de Comadres nuna fiesta especial pol cuarentenu aniversariu del coleutivu que tuvo llugar en La Buena Vida y qu’animó’l grupu Assia. El Felpeyu, antipremiu, foi para la farmacéutica Bayer “pola so campaña publicitaria ‘goler a pescáu ehí abaxo”.
También ayeri s’inauguraba la esposición ‘40 años de comadres y felpeyos’ que se podrá visitar hasta el 8 de marzu, Día Internacional de la Muyer, nel Centru de Cultura Antiguu Institutu. Ésta ta comisariada por Leticia Tomás Sáenz de Tejada.
