Jerry Buttimer, ministru de Mediu Rural y Desendolcu Comunitariu, amosó interés en collaborar na Rede Europea de Ciudaes de la Mazana y la Sidre (Cider Cities) y comprometióse a treslladar información al restu del Gobiernu irlandés
Miembros la directiva de la Rede Europea de Ciudaes de la Mazana y la Sidre (Cider Cities), ente ellos el sociu fundador y presidente de la Fundación Asturies XXI, Marcos Abel Fernández, ta estos díes n’Irlanda pa reforciar les rellaciones coles instituciones d’esti país con tanta tradición sidrera. Dende’l vienres la delegación asturiana ta celebrando alcuentros oficiales dientro d’un apretáu programa de visites institucionales coles autoridades irlandeses.
El primer aconceyamientu foi con Jerry Buttimer, ministru de Mediu Rural y Desendolcu Comunitariu d’Irlanda, al que se-y entregó una carta del so homónimu asturianu, el conseyeru de Mediu Rural y Política Agraria, Marcelino Marcos. Nel alcuentru recibió también la invitación formar pa participar en Cider Cities, esplicando-y con detalle en qué consiste esta asociación de ciudaes y conceyos productores de sidra per toa Europa y en qué consistiría esta collaboración. L’irlandés amosó interés en collaborar y comprometióse a treslladar la información al restu del Gobiernu, sobre manera al senador que trabaya a nivel de asociaciones rurales; tamién a los representantes del so país nel Parllamentu européu.
Los desplazaos tamién pudieron vese con Moira Murrell, CEO of Cork County Council, col qu’aldericaron de les posibilidaes de collaboración colos integrantes de Cider Cities. La selmana qu’entra continuarán colos aconceyamientos, entregando al presidente de la Cámara de Comerciu de Cork una carta del presidente de la Cámara de Comerciu xixonesa, y con Clir Dan Boyle, alcalde de Cork, na Casa Conceyu. L’actu últimu nel que participarán tien un especial conteníu simbólicu: llantarán un pumar nun tarrén públicu de Carrigaline.
