El Muséu del Pueblu d’Asturies acueye esti sábadu por decimosegundu añu esta iniciativa de ‘Reciella. Families pol Asturianu’ abierta a tola ciudadanía, qu’esti añu lleva’l lema de ‘Siguimos semando’; la sesta carrera Entaína va abrir una bayurosa y variada programación de talleres y eventos
Nel 2013 nacía’l Día de la Reciella pa ufrir a neños y neñes la oportunidá de vivir una xornada n’asturianu dafechu xunto coles sos families. Güei los neños y neñes d’aquel primer añu yá son mozos, pero lo semao naquellos años y nos posteriores espolletó, contribuyendo a la tresmisión xeneracional del idioma, oxetivu col que un grupu de padres y madres creó l’asociación ‘Reciella. Families pol Asturianu’. El sábadu xeneraciones nueves y munchos de los que disfrutaron d’aquella primera edición repetirán na decimosegunda d’esta iniciativa que tien nesta ocasión como lema un mui espresivu ‘Siguimos semando’.
Va ser, como siempre, nel Muséu del Pueblu d’Asturies y, a diferencia de nos entamos, con actividaes tamién enfocaes a mozos y moces, non sólo a un públicu infantil, pol lóxicu crecimientu de les persones a les que van dirixíes. Va abrir la xornada la sesta carrera Entaína, un percorríu cenciellu pel recintu museísticu abiertu a tol mundu, y nel que trés persones d’una mesma familia van pasase un relevu simbolizando asina la tresmisión xeneracional del idioma de güelos a fíos y a nietos. Nesta ocasión van ser los Solar, de Deva, Lali, Inacio y Enol, los protagonistes, hermana, sobrinu y sobrinu-nietu del poeta Andrés Solar, fináu n’accidente de tráficu nel 1984 cuando tenía namái 29 años. Les inscripciones van abrise a les 11 y la salida ta prevista media hora depués.
Un taller pa deprender a facer chapes, del que se va encargar ADAE, va abrir la programación prevista nel tendayu a les 12.15 hores, cola oportunidá de siguir poniendo en práutica los conocimientos alquiríos de tarde, a les 16.30 hores, mentes que los que quieran atrevese col puntu de cruz van poder ponese a ello a les 12.45 hores de la mano de Ringo Rango. A les 13.30 hores va haber baille en familia y a les 14.15 una sesión musical con DJ Furo.
Depués d’un posa y de xintar nel guapu entornu del Muséu del Pueblu d’Asturies va llegar el momentu de facer deporte pa baxar la fartura. A les 16 hores va xugase el Mundialín InterReciella de fútbol, con comentarios n’asturianu, actividá que siempre tien muncha repercusión ente los presentes. Asturxules, creadores de conteníos que participen per primer vez nel Día de la Reciella, van poner a les 17.15 hores la charra-taller ‘Falar asturianu ye de xules’ y Xabel Álvarez Miranda va deprender a tocar el pandeiru a les 18 hores, pa lo que collabora Cartonajes VIR aportando’l material.
La Banda Gaites Saxum, que tamién debuta, va tocar a les 18.45 hores, enantes de que la tradicional Danza Prima ponga’l pieslle a esta xornada pa deprender y disfrutar n’asturianu. Amás, a lo llargo de tola xornada, les persones que s’averen al Muséu del Pueblu d’Asturies, que cuenta con accesu llibre, van poder visitar un mercadín de ropa y productos en llingua asturiana, espacios como’l d’Acuto Xuegos, ADAE o la Oficina de Normalización Llingüística de Xixón, y un chigre con comida y bébora. Amás de los yá citaos, collaboren nel Día de la Reciella, iniciativa que nel 2018 algamó’l sofitu públicu del Conceyu al traviés d’una declaración institucional, Impronta, La Fabriquina, Pintar-Pintar, Trabe, Iniciativa pol Asturianu y el Gobiernu d’Asturies.
