Nel 2020 l’equipu xixonés fusionóse col UC Ceares al traviés de la Escuela Mesta de Fútbol pa «cubrir les sos necesidaes deportives» y siguir potenciando el so llabor formativu cola fin de «incentivar a los críos a la hora de facer deporte, sociabilizar y dar una continuidá a la so vida deportiva»
Un doble escudu, el del Veriña y el del UC Ceares, llucen los xugadores d’esti equipu de la zona oeste del conceyu na camiseta dende’l 2020. Ye nesti añu cuando los dos clubes lleguen a un alcuerdu pa incorporar al primeru a la Escuela Mesta de Fútbol creada nel 2015 xunto col Gijón Fútbol Femenino y fusionar les dos canteres pa que’l Veriña se convierta nel nucleu de la base del equipu de Ciares en fútbol campu. «Con esti alcuerdu cubríense les necesidaes de los dos clubes. Per una parte, el Veriña tenía instalación y categoríes, y el Ceares tenía críos pa eses categoríes y nun disponía d’instalación. Entós foi un poquitín una ayuda mutua», rellata Ramón ‘Monchu’ Bernardo García, direutor deportivo, que procede del UC Ceares.
«El Ceares pasó a aforrar 27.000, 25.000 euros, tolos años en campos y el Veriña cubría sus necesidaes deportives», añade Monchu. La xunión, o patrociniu, como se refier de manera oficial na Federación, vieno acompañada d’un ascensu y una permanencia del primer xuvenil a División d’Honor, agora en Lliga Nacional, y de dellos xugadores promocionaos al UC Ceares por cuenta de la filialidá alcordada, sirviendo el club xixonés de plataforma a ésta o a otres entidaes que compiten en Tercera RFEF o Primera Asturfútbol, como’l Sporting. Asina, «ente 15 o 20 xugadores» procedentes de Veriña debutaron nesti tiempu nel UC Ceares y «8 quedaron en plantía», como Álex Feito y Pedro González esta temporada, titulares na victoria del domingu cola SD Lenense (2-0).
Un espeyu nel que mirase los 290 xugadores del Veriña, d’edaes ente los 4 y los 19 años, con una estructura na que participen 32 entrenadores ente téunicos, auxiliares, entrenadores de porteros y preparadores físicos que desendolquen los sos trabayos en Lloreda, onde entrenen y compiten tolos equipos n’instalaciones compartíes cola AD Lloreda. «El nuesu enfotu ye formar críos, incentivalos a la hora de facer deporte, sociabilizar y dar una continuidá a la so vida deportiva», afirma Monchu, qu’asitia’l fin de la etapa cadete, «una vez pasen los 15, 16 años, cuando yá se-yos esixe un poco más, cuando los enseñamos a competir». «Nós valoramos tres etapes: etapa d’entamu, la que se fai en pista, en fútbol 5; etapa de formación, que ye la d’alevines en fútbol 8 y infantiles; y llueu yá la etapa de competición. De profútbol a infantiles tratamos que xueguen toos, que toos participen, que toos lo intenten y vayan ameyorando», comenta. Una idea compartida polos dos equipos, polo que la fusión «foi fácil. Teníemos una filosofía asemeyada y los valores de los dos clubes yeren mui similares».
Ente ellos ta un fondu respetu pa cola la llingua asturiana.«La web, les redes sociales, la publicidá…, van n’asturianu o billingüe, como fai’l Ceares», rellata Monchu, que destaca l’usu de la etiqueta #CanteraTeyera. Una cuestión, ente otres munches, que convierte al UC Ceares nun equipu diferente y que’l Veriña incorporó de manera natural depués d’una fusión positiva pa los dos clubes, de la que se beneficien decenes de neños de Xixón.
