Compartir públicamente esta esperiencia ye una deuda que tengo dende va nueve años con una de les persones que más quiero y almiro, Yolanda Huergo, quien fue conceyala del Ayuntamientu de Xixón
El 5 de marzu del añu 2015 comunicáronme lo que definieron como “hallazgu casual”: sarcoma del estroma endometrial. Un cáncer, nel llinguaxe vulgar y cotidianu, insospecháu pa los médicos y pa mi, qu’al tiempu que garró forma y nome nel mio cuerpu despertó una preocupación inmediata: ¿Quién-y lo diz a la mio familia? Asina, dende’l mesmu instante en que’l médicu me dio la noticia, na mio cabeza solo resonó la necesidá de curiar, ensin importar el restu de les esplicaciones. L’afectación a la mio vida yera l’afectación a los míos. Y de fondu había una estraña satisfacción en que me tuviere pasando a mi, como si eso llograre salvalos a ellos. Por eso, cuando los diba llamando esa mañana fui convocándolos a una celebración. A fin de cuentes, yera’l día del mio cumpleaños y nesi momentu inda tábemos toos vivos. Lo que nun sabía yera que la mayor preocupación vendría inmediatamente depués y ensin contemplaciones.
Compartir públicamente esta esperiencia ye una deuda que tengo dende va nueve años con una de les persones que más quiero y almiro, Yolanda Huergo, quien fue conceyala del Ayuntamientu de Xixón. Bien de veces me pidió que falare d’ello, aprovechando l’altavoz que tenía como trabayadora en medios de comunicación dende l’añu 2004. Sin embargu, nun lo ficiere quiciás pol pudor de pensar que s’interpretare como pretensión de victimizame. (Ye increíble cómo’l temor a exhibir debilidá y el síndrome de la impostora, entellazaos nel espíritu como los xenes nel ácidu desoxirribonucleico, nos condiciona hasta pa cuestionar la oportunidá de poner en común les desgracies). Por eso aprovecho esti brinde a escribir de la responsabilidá qu’ocupo partiendo d’una anécdota personal pa esponer abiertamente dalgo qu’hasta agora permanecía nel tarrén discretu de lo privao, a sabiendes de que nin lo que me pasó nin cómo lo viví ye nenguna escepción, sinón tolo contrario. Lo personal ye político. Y viceversa.
Non en poques ocasiones falemos Yolanda y yo de la distancia que s’abre ente la enferma y el mundu dende’l momentu en que se recibe’l diagnósticu, y del impulsu cuidador hacia les persones más próximes cuasi como una tabla de salvación y dispersión. Cuantísimes veces compartimos lo que cuesta esplicar la mancadura que dexa nel alma una ciruxía radical que trestoca de manera inevitable’l to proyectu de vida. Pero si dalgo llamentábemos por ser especialmente cruel nesta situación ye l’angustia de tener que preocupase más pol inmediatu futuru llaboral que poles probabilidaes d’una recidiva. Porque trabayar como muyer profesional autónoma nun sector munches veces precarizáu como ye’l cultural supón que la posibilidá d’enfermar seya más qu’una terrible amenaza. Dicho d’una manera torpe y redundante: el deséu desesperáu de vivir queda nun segundu planu porque lo urxente ye buscar con qué mantenese viva. Y equí vien la denuncia y el porqué de trabayar col doble oxetivu de meyorar les condiciones llaborales y garantizar los derechos de les persones.
La enfermedá suel ser reveladora y enséñanos de mui diferentes formes hasta qué puntu somos vulnerables. En dalgunos casos, de lo vulnerables que yá yéremos y nun nos dábemos cuenta. Especialmente les muyeres, quien avezamos a sufrir una doble precarización. Si va unos meses UXT denunciaba que solo la metá de les trabayadores por cuenta ayena que sobreviven a un cáncer de mama se reincoporen al so puestu llaboral, nel casu de les trabayadores autonómes hai qu’incidir na estrema dificultá na que s’encuentren dende’l mesmu diagnósticu. Porque teniendo en cuenta la base de la cotización en sectores como’l cultural o’l deportivu suel ser la mínima, el líquidu mensual queda reducíu a una cantidá que fai la subsistencia imposible, si pensamos qu’a la cuantía de la prestación a percibir hai que restar l’aportación de les cuotes de la Seguridá Social. Ye dicir: una nun puede permitise nin siquiera tar enferma, nin centrar tolos esfuerzos na so recuperación.
Nel mio casu, la reincorporación al mundu laboral muncho más rápida de lo deseable y la reinvención, como la que parte de cero, fue imprescindible. Tamién la concienciación sobre les debilidaes y desigualdaes del sistema, especialmente n’ámbitos onde la precariedá y la desigualdá van prácticamente de la mano.
Pienso en sectores como’l cultural o’l deportivu nos qu’abonden les y los profesionales autónomos y les empreses prácticamente unipersonales, y onde se tiende socialmente a abusar del voluntarismu y lo vocacional pa que se trabaye de forma altruista. Dos sectores onde la presencia de les muyeres ye considerablemente alta, pero les diferencies siguen siendo notables. La so ausencia en puestos de responsabilidá o directivos sigue ensin ser representativa nin equilibrada, lo que se traduz tamién n’otra serie de desigualdaes como son la falta de reconocimientu y visibilidá. Esto non solo dificulta facer xusticia, el so ascensu na pirámide empresarial o ofrecer los referentes que debemos a la sociedá de mañana. Tamién implica la carencia d’una mirada atenta a les sos (nuestres) necesidaes y l’estancamientu del desarrollu de carreres d’un potencial incuestionable. Asina, sigue siendo difícil atopar muyeres liderando equipos o capitaniando proyectos. Queda muncho por facer pa que deportistes o artistes de trayectoria intachable puedan profesionalizase y tener sueldos dignos que-yos permitan dedicase a potenciar el so talentu y diseñar un proyectu de vida. Falta pa que les veamos nos medios de comunicación, nos sitios onde s’adopten les decisiones, nel palmarés de los grandes premios o nos sillones de les academies na mesma proporción na que consiguen los sos llogros. Y falta verdadera concienciación, voluntá y escucha pa facer posibles medios y midíes que son absolutamente necesaries, máxime n’espacios onde existen dificultaes y nos que les muyeres les padecen doblemente.
Pa con eses acciones tamién necesitamos la superación d’estigmes que’l sistema patriarcal nos lleva a dixerir na intimidá con consecuencies sociales. Necesitamos erradicar el sentimientu de culpa por persiguir los nuestros suaños. Que desapareza’l complexu d’inferioridá y la incómoda sensación d’ocupar lo que nun nos correspuende cada vez que damos un pasu. Precisamos que nun nos atormente’l temor a enquivocanos o a traicionar espectatives. Y que dexemos de xustificanos o pidir disculpes cada vez que nos cuntemos dende’l yo, sin anteponer l’omnipresente nosotros. Necesitamos que nun nos paralice l’autocuestionamientu nin nos castiguemos por escoyer caminos que nun son los que nos señalaron. Y pa eso nun necesitamos que nos ayuden. Necesitamos que se comparta la responsabilidá de facer meyor y más xusta esta sociedá a la que toles persones sumamos.
Escribió Gil de Biedma que pa saber del amor, tener tao sola ye necesario. Por eso güei, cuasi una década más tarde del momentu vital que reordenó’l mio corazón y la mio cabeza, cuando tengo l’honor de cuntar cola confianza del Presidente d’Asturies pa intentar trabayar polos derechos de les persones y por meyorar les condiciones oxetives de los sectores al frente de la Conseyería de Cultura, Política Llingüística y Deporte, garro fuerza dende la esperiencia particular, sabiendo que desgraciadamente ye compartida. Afrontando esta enorme responsabilidá con ilusión y voluntá d’esfuerzu. Cola motivación de ser arte y parte nesta historia. Y dende’l convencimientu de que tou avance merez dexase la piel y ye necesariu.
Vanessa Gutiérrez, conseyera de Cultura, Política Llingüística y Deporte
