L’Asociación de Docentes d’Asturianu y Eonaviego/Gallego-asturiano (ADAE) presentó esti xueves el ‘Manifiestu pola Creación de la Especialidá Docente’ que firmen partíos políticos que conformen una mayoría parllamentaria na Xunta Xeneral, sindicatos, l’Academia y coleutivos
La modificación de los RD 1594/2011, el RD 1834/2008 y el RD 287/2014, los reales decretos que regulen les especialidaes docentes de los cuerpos de Maestros, de profesoráu d’Educación Secundaria y d’Escueles Oficiales d’Idiomes «col oxetivu d’incorporar la posibilidá de crear la especialidá docente de llingües propies que, nun siendo cooficiales, tengan reconocimientu xurídicu ya implantación curricular», llabor que-y correspuende al Ministeriu d’Educación, Formación Profesional y Deportes, ye’l pidimientu que vien faciendo dende va años el Gobiernu d’Asturies y los profesores d’asturianu y eonaviego a Madrid, con negativa continua cola escusa de la non oficialidá de los dos idiomes. Ayeri, l’Asociación de Docentes d’Asturianu y Eonaviego/Gallego-asturiano (ADAE) presentó n’Uviéu’l ‘Manifiestu pola Creación de la Especialidá Docente’ p’amosar la xunidá esistente na comunidá nesta reclamación que los sindicatos incluyeron nel pautu ‘Asturies Educa’ que punxo fin a la fuelga educativa de xunu. La conseyera Eva Ledo comprometióse nesi momentu a volver a llevar l’asuntu al ministeriu.
Ente los firmantes, partíos políticos que conformen una mayoría parllamentaria na Xunta Xeneral: FSA-PSOE, Convocatoria por Asturies (IX-Más País-IAS), Foro y la diputada Cova Tomé (sumen 24 de los 45 diputaos de la Cámara). Tamién Sumar y dos fuercies ensin representación, Podemos y Aína, partíu asturianista de creación reciente qu’entovía nun se presentó a unes eleiciones. El Partido Popular (PP), que nel pasáu tien sofitada esta demanda, llegando a llevar una iniciativa parllamentaria al respeuto, desmárcase. De los sindicatos, roblen el testu UXT, CCOO y SUATEA, y de los movimientos sociales, la Xunta pola Defensa de la Llingua Asturiana (XDLA), Iniciativa pol Asturianu y ‘Reciella. Families pol Asturianu’. Completa la llista l’Academia de la Llingua Asturiana (ALLA) y la Facultá de Formación del Profesoráu y Educación de la Universidá d’Uviéu, qu’acoyó l’actu de presentación del manifiestu, al qu’acudieron representantes de tolos partíos, a esceición de Foro.
El documentu recuerda que «dempués de cuatro décades de docencia de les llingües propies d’Asturies y con presencia en tolos niveles de cada etapa educativa, el profesoráu de les especialidaes de Llingua Asturiana y Gallego-Asturiano continúa desendolcando les sos funciones en condición d’interinidá», una situación que, «amás de discriminatoria, supón un incumplimientu claru de la normativa europea en materia de contratación nel sector públicu, que prohíbe l’abusu de la temporalidá y demanda midíes efectives pa la estabilización». Asina, los 332 maestros que dan clase esti cursu d’asturianu y eonaviego, «col mesmu nivel formativu y el mesmu trabayu que’l restu del profesoráu, nun tienen posibilidá d’acceder a una plaza estable pela vía d’un concursu-oposición nuna especialidá reconocida llegalmente baxo los principios d’igualdá, méritu y capacidá».
«La creación de la especialidá docente ye una necesidá urxente, llexítima y plenamente xustificada, tanto dende’l puntu de vista llegal como educativu y llaboral. El Ministeriu d’Educación, Formación Profesional y Deportes tien la obligación de dar rempuesta a esta situación y de garantizar la igualdá de condiciones del profesoráu», reclamen estes organizaciones al tiempu que-y piden a Madrid «responsabilidá institucional».
No es urgente, ni legítima ni está justificada habiendo las graves carencias que hay, especialmente en sanidad. Tengo a mi madre ingresada en la Cruz Roja y aunque los profesionales son excelentes, las habitaciones parecen el camarote de los hermanos Marx. Parecen una celda y si ponen la silla para que no estorbe no puedes abrir el armario.
Más recursos a sanidad y menos a chiringuitos de cuatro vividores quue quieren vivir del cuento imponiendo algo que no se habla.