El Vienres Santu va vivise una edición nueva, la ventena primera, d’esti eventu sidreru que los sos organizadores presenten con un anunciu gráficu qu’amuesa una nalga que dexa entever una cruz cola forma del cuerpu, imaxe a la que Bluesky y X nun-y dan el preste
Avérase la Selmana Santa y, como tolos años dende va dos décades, un piñu d’aficionaos a la sidra prepárense pal so particular viacrucis. Yá ta equi’l Sidracrucis, la ruta sidrera per chigres y llagares qu’entama la revista La Sidra en Vienres Santu y qu’engancha a tolos que s’atreven a disfrutala. La organización yá anunció la edición d’esti añu, la ventena primera, y pa ello asoleyó un inxeniosu cartelu que ta xenerando reaiciones positives nes sos cuentes en redes sociales. Sicasí, dos compañíes nes que tán presentes nun paecen entendelu.
«Ye una semeya que dexa entever unes nalgues y, al empar, la forma del cuerpu xenera l’aspeutu d’una cruz. Facemos el doble sentíu de culín, culín de sidra y un culín de culu, y ponemos el testu de ‘Toma un culín’», esplica Llucía Fernández Marqués, redautora de la revista y organizadora del Sidracrucis. «Ta faciendo gracia. Tolos años sacamos cartelos que tengan un poco de provocador, un poco d’iconoclasta, y pa riise un poco», asegura al tiempu que rescampla que les úniques oxeciones al mesmu lleguen de fuera, de les propies empreses de redes sociales. «Bluesky ponlu como conteníu p’adultu y X directamente esbórrialu. Yá lu tuvimos que xubir delles veces», asegura.
«La idea d’esti cartelu ye promocionar el Sidracrucis, que ye un eventu lúdicu-festivu, divertíu, y la xente entiéndelo como lo que ye, como dalgo gracioso», valora Marqués sobre un cartelu que sí xenera una dulda: «naide sabe si ye d’home o de muyer», llanza.
Abierta la preinscripción
El Sidracrucis va tener salida pela mañana del 18 d’abril del llocal de La Sidra pa depués pasar per trés chigres de Xixón entovía por confirmar, anque’l primeru va ser La Montera Picona de Ramón. La ruta complétase con una visita didáctica a un llagar y una espicha de pieslle, mentes que la xinta va tener llugar nel Primer Sidre l’Añu. Entovía nun ta zarráu’l preciu, pero yá ye posible preinscribise al eventu al traviés de les redes sociales y víes de contactu habituales de la revista La Sidra.
