L’autor, xunto Cécile Gorré, de ‘À l’école du capitalisme’, espublizáu esta mesma selmana en castellanu por Hoja de Lata, va tar el llunes nel Antiguu Institutu nun actu que va contar cola participación de la so traductora, Beatriz Quirós, militante de SUATEA
L’impautu del neolliberalismu y la mercantilización de la educación ye sobre lo que xira l’ensayu ‘À l’école du capitalisme’, fechu a comuña por Nico Hirtt y Cécile Gorré, qu’Hoja de Lata traxo al castellanu y que ta disponible en llibreríes dende esti mesmu llunes. La so traductora y prologuista ye Beatriz Quirós, expresidenta de la Xunta de Personal Docente asturiana y militante del Sindicatu Unitariu Autónomu de Trabayadores de la Enseñanza d’Asturies (SUATEA), organización que collabora na presencia del coautor, nacíu en Luxemburgu, n’Asturies estos próximos díes p’afondar nos conteníos de la obra en dos actos, n’Uviéu y Xixón.
El primeru va ser nel marcu del II Pan y Roses, festival de lliteratura política y social que se va desenvolver el sábadu y domingu nel espaciu uvieín Kuivi Almacenes, y va consistir nun diálogu ente Hirtt y Quirós que va abrir la segunda xornada, a les 11 hores. Al día siguiente, llunes, la presentación de ‘En la escuela del capitalismo’ va tener llugar en Xixón, a les 19 hores nel Antiguu Institutu, tamién cola presencia del pedagogu y la traductora.
«Los resultaos del últimu informe PISA nun faen otra que confirmar que les tesis de Nico Hirtt dan nel clavu a la hora d’analizar los problemes actuales de los sistemes educativos», apunten dende SUATEA, organización que l’añu qu’entra cumple mediu sieglu de vida. Según esplica, el llibru plantega un análisis de la evolución de los sistemes educativos depués de más de dos décades de polítiques neolliberales y analiza los mecanismos colos que, n’opinión de los sos autores, les esixencies del mercáu y de les empreses alquirieron un pesu creciente na educación. L’impautu de les nueves teunoloxíes y de la intelixencia artificial, el desembarcu de les grandes empreses na Formación Profesional, la creciente privatización de los sistemes educativos y la situación de la enseñanza pública, incluyendo cuestiones rellacionaes cola so financiación y coles polítiques d’apoyu a los centros privaos-concertaos, son dalgunes de les cuestiones que se toquen.
Asoleyáu en xineru, el sindicatu considera qu’esta obra que llega agora al mercáu estatal de la mano d’Hoja de Lata ye especialmente relevante «pal debate sobre’l futuru de la educación pública» nun contestu marcáu, apunten, por «la publicación de los resultaos del últimu informe PISA» y «les recientes movilizaciones del sector educativu nel Estáu español».
