La Mesa Sectorial Docente estraordinaria celebrada esti martes trató la modificación de los reales decretos necesaria pa la so creación, procesu amenazáu pol adelantu eleutoral; el Conseyu de Ministros del día 13 autorizara la tramitación alministrativa urxente del proyeutu
La disolución de les Cortes por mor del adelantu eleutoral nun impide que’l Conseyu de Ministros pueda hasta’l 29-P siguir aprobando reales decretos, pero el de modificación de los tres que toquen la cuestión de la especialidá docente d’asturianu y gallego-asturiano, el de Primaria, el de Secundaria y el de las Escuelas Oficiales de Idiomas, sigue pendiente. El reló corre, lo que crea preocupación ente los más de 300 maestros y maestres pendientes d’un trámite que-yos permitirá contar colos mesmos derechos llaborales que los sos compañeros de centru, pero dende’l Ministeriu d’Educación, Formación Profesional y Deportes aseguren que se va llegar a tiempu.
Asina lo confirmaron a los sindicatos na Mesa Sectorial Docente estraordinaria celebrada na tarde d’ayeri. La cuestión yera uno de los puntos del día y Borja Llorente, secretariu xeneral del Sindicatu d’Enseñanza de Comisiones Obreres (CCOO) Asturies, y una representación del Sindicatu Unitariu Autónomu de Trabayadores la Enseñanza d’Asturies (SUATEA) al traviés de STEs-i, interesáronse precisamente polos tiempos. «Dixeron que diben cumplir en plazu tolos trámites», apuntó a miGijón Llorente, satisfechu pol resultáu del conceyu, mentes qu’a la salida SUATEA espresaba que «nes selmanes próximes prevése que fine’l trámite en Madrid, y la pelota pasará yá a tar nel teyáu del Gobiernu asturianu, que tendrá que tener los deberes fechos yá».
En concreto, lo que va facer l’Executivu central ye incluyir la posibilidá de que les autonomíes con llingua non oficial, pero reconocida xurídicamente nos sos estatutos, puedan crear la so especialidá docente, una demanda fecha por Asturies pal asturianu y el gallego-asturiano, pero de la que tamién pue beneficiase’l lleonés y l’aragonés si asina lo quixeren Castilla y Lleón, y Aragón. «Recordamos que la conseyera Ledo comprometióse a tener adelantáu’l trabayu pa la ellaboración del decretu autonómico que regule les especialidaes de les llingües propies d’Asturies pa garantizar el so cumplimientu enantes del final de la llexislatura presente», espón SUATEA.
L’Asociación de Docentes d’Asturianu y Eonaviego/Gallego-asturiano (ADAE), coleutivu que vien movilizándose pa facer realidá esta vieya demanda de la comunidá educativa asturiana, caltién l’optimismu de ver la modificación de lo tres reales decretos espublizada nel Boletín Oficial del Estáu (BOE) enantes del 29-P depués de les noticies recibíes ayeri dende Madrid. El Conseyu de Ministros del día 13 autoriza la tramitación alministrativa urxente prevista del proyeutu de Real Decretu de modificación, lo que permite acortar plazos, y, enantes de la so aprobación definitiva, ha pasar pel Conseyu Escolar del Estáu, qu’ellaborará un informe non vinculante, y pel Conseyu d’Estáu.
