«Nun vamos quedar tranquilos hasta velo nel BOE y nel BOPA», apunten los docentes d’asturianu

ADAE cancela finalmente la concentración d’esti martes frente a Presidencia énte’l compromisu del Ministeriu d’Educación de modificar los reales decretos pa la creación de la especialidá de Llingua Asturiana y Gallego-Asturiano; «vamos tar enriba de la cuestión pa que se cumplan los plazos», avisen

Los más de 300 maestros y maestres de Llingua Asturiana y Gallego-asturiano celebren l’alcuerdu que va permitir la creación de la especialidá docente de la materia, demanda de décades de la comunidá educativa que va permiti-yos contar colos mesmos derechos llaborales que los sos compañeros de centru. El Ministeriu d’Educación fadrá enantes de que fine l’añu la modificación normativa que va permitir a les comunidaes con llingua propia non oficial pero reconocida xurídicamente nos sos estatutos, casu d’Asturies, Aragón o Castiella y Lleón, desendolcar la especialidá darréu, lo que’l Gobiernu asturianu cuenta con tener pa lo último de marzu o lo primero d’abril. Una situación que lleva a l’Asociación de Docentes d’Asturianu y Eonaviego/Gallego-asturiano (ADAE) a cancelar finalmente la concentración de mañana de les 12.30 horas frente a presidencia.

«L’oxetivu de la mesma yera que’l Gobiernu tomara en serio la cuestión y tuviera cuanto enantes una reunión cola ministra pa falar con esti tema», esplica la so presidenta, Claudia Menéndez, dalgo qu’aconteció finalmente’l xueves con aceptación de la demanda de maestros, sindicatos y Executivu asturianu, polo que la protesta nun va tener llugar, «lo que nun quita que vayamos tar enriba d’esta cuestión pa que se cumplan los plazos». Nesi sen, destaca que «sabemos que yá teníen trabayu adelantáu tanto nel ministeriu como na conseyería», pero «vamos siguir pendientes. Hasta que nun veamos qu’oficialmente se recueye nel BOE y nel BOPA, nun vamos quedar tranquilos y tranquiles».

PUBLICIDAD