Carlos Río, asturianu residente n’Oslo, traxo nel 2012 a Uviéu esti deporte nacíu nos Estaos Xuníos na década de los 60 que sigue creciendo en númberu de campos y xugadores; anguaño na comunidá hai seis «en parques públicos, polo que son gratuitos», destaca Raúl López-Cancio, direutivu del Disc Golf Club Oviedo, primeru en fundase
Mui popular en décades pasaes, el ‘frisbee’ o discu volador caltiénse na memoria de gran parte de la ciudadanía. Ye raro atopar a daquién que nun tuviera ún nes sos manes y s’atreviera a llanzar esti oxetu que tomó’l so nome comercial de los moldes de tarta de la empresa estauxunidense Frisbie Pie Company, a la que fai un chisgu la película de cultu ‘Back To The Future III’, que llegó a los nuesos cines como ‘Regreso al Futuro III’. Un xuegu qu’evolucionó nel mesmu país norteamericanu va más de mediu sieglu a una práutica deportiva combinada col golf, naciendo asina’l disc golf, disciplina que dende va unos años pue vese en dellos parques públicos asturianos.
El disc-golf llegó a Asturies, en concreto a Uviéu, de la mano de Carlos Río nel 2012. Asturianu de 63 años residente n’Oslo que coló mui mozu, ye una eminencia d’esti deporte y del ‘frisbee’, como amuesa que tea acabante d’ingresar nel ‘Hall of Fame’ o ‘Salón de la Fama’ de la disciplina, espaciu simbólicu d’homenaxe con muncha tradición n’Estaos Xuníos que namás recibe a los meyores. Y ye qu’en Noruega, como nel restu de países nórdicos, tuvo una importante implantación. «Aconceyó colos téunicos del Conceyu, propunxo la idea, que yera difícil al tratase del primer campu d’España y nun haber nenguna referencia previa, y viéronlo con mui bonos güeyos», recuerda Raúl López-Cancio, ún de los primeros xugadores asturianos y socio de Río en la empresa CRK DiscGolf, que se dedica al diseño de campos y venta de material, xunto col so hermanu Fernando.
Sería el Parque d’Iviernu’l primero en llucir les tan carauterístiques canastes con cadenes que faen la función del fueyu nel golf, un total de 9. Llueu, nel 2014, llegaría’l del Parque Purificación Tomás, único de 18 fueyos. En Xixón, el de La Carbayera, área recreativa de Granda, nun s’abriría hasta’l 2021. Complente el llistáu de campos el d’El Campo’l Morgal, de 3 (2016); el del Centro Asturiano de Oviedo, de 4 (2018), únicu nun club priváu; el de Grau, de 4 canastes y 9 fueyos (2024); y el de Villaviciosa, activu dende esti mesmu añu, de 5. «Una carauterística ye que tán en parques públicos y son gratuitos», destaca López-Cancio. Toos ellos nacen de la iniciativa del Disc Golf Club Oviedo, el primerude España, del que ye direutivu,que tien nos sos estatatutos «la difusión y promoción del disc golf». Asina, «compramos material, que guardamos nel club, y ponemos de baldre a disposición delos conceyos. Por exemplu, nel casu de Xixón, fiximos una cesión per un añu y si pasáu esi tiempu-yos interesaba comprábase o ampliábase, como asina foi. Punximo-yos ún de cinco canastes y a los cincos meses decidieron que diseñáramos l’actual, de 9 fueyos. Ye una manera de probalo, pa ver si furrula o non».
El Disc Golf Club Oviedo, que se formó alrededor de les amistaes que mantenía en la ciudad Río —López-Cancio conociólu al traviés d’un collaciu común—, foi medrando poco a poco nos años vinientes a la fundación. «La xente vete xugando nel Parque d’Iviernu y entruga», diz. Agora son 12 los clubes esistentes n’España, dos con sede n’Asturies —el Oviedo y el Asturias Disc Golf—, y esti mesmu más, na ponte pol Pilar, la población andaluza de Chipiona acoyó los Campeonatos d’España de la disciplina, entamaos per primer vez nel 2013. «Al añu de fundanos creóse otru club en Madrid, pero al principio xugábamos solos», recuerda.
Anguaño n’Asturies hai 60 xugadores ‘federaos’ —al nun ser entá consideráu como deporte pol Conseyu Superior de Deportes (CDS) nun pue contar con una federación y funciona como una asociación a nivel estatal, l’Asociación Española de Disc Golf (AEDG)—, dende l’Oviedo y CRK DiscGolf trabáyase al traviés d’escolinos o conceyos, como’l de Xixón nes actividaes del Patronatu Deportivu Municipal (PDM) pa formar prauticantes, y l’oxetivu ye llegar a contar con un espaciu n’Avilés. «La introducción ye inmediata; al momentuentiendes el xuegu. Ye un deporte pa toles edades, toles condiciones físiques, que xuegues na naturaleza y que ye mui económicu: nun pagues nada por jugar, con un discu yá tienes, anque los que competimos a veces vamos con 20 discos diferentes. Tamos falando de 15 euros, 12, pal más básicu», apunta López-Cancio. Un conocimientu al qu’ayuda’l fechu de que sía igual al golf, colos mesmos términos, como par o ‘birdie’, «lo único que cambiamos los palos polos discos».
Pero, ¿qué cualidaes faen falta pa ser un bon xugador de disc golf? «Coordinación, téunica», respuende. «Nun ye un deporte de fuerza física, anque si yes una persona con muncha envergadura de brazos, como’l movimientu ye de llátigu, pue ayudate un poco», completa. Les persones que quieran prauticalu namás tienen que ponese en contautu con dalgún de los clubes asturianos. Nel casu del d’Uviéu, tolos domingos últimos de mes queden a les 11 hores nel Parque d’Iviernu, momentu pensáu pa que, «cuando venga xente nueva pueda xugar; dexamos-yos discos pa enseña-yos y que prueben». Una bona escusa p’averase, facer exerciciu y disfrutar de la naturaleza.
