‘La mirada ordenada’, obra que s’avera al cine asturianu al traviés del análisis de nueve películes, y ‘Secretos’, una historia centrada nel mundu animal, son los trabayos merecedores del XXXII Máximo Fuertes Acevedo y del XIX María Josefa Canellada

Cola llegada de setiembre entamen a fallase la mayor parte de los Premios Lliterarios qu’entrega la Conseyería de Cultura, Política Llingüística y Deporte. En xunu conocíase qu’Arantza Margolles algamaba’l XVIII Premiu Alfonso Iglesias de cómic por ‘Slečno’, trabayu basáu nel diariu de viaxe d’una muyer asturiana con raíces en Moravia que viaxa a Olomouc pa deprender checu, y ente ayeri y güei diéronse a conocer los ganadores del XXXII Premiu Máximo Fuertes Acevedo d’ensayu y del XIX María Josefa Canellada de lliteratura infantil y xuvenil.
El primeru foi pa Ramón Lluís Bande por ‘La mirada ordenada’, obra que s’avera al cine asturianu al traviés de l’análisis de nueve películes, un trabayu valoráu pol xuráu como «valiente, creativu, orixinal y mui necesariu». Ésti tuvo conformáu por Darío de Dios, Claudia Elena Menéndez, María Fernández Abril, Jorge Arturo Sierra y Iris Díaz Trancho, ganadora de la edición anterior con ‘Al verde d’El Cierru’, con Antón García, direutor xeneral d’Aición Cultural y Normalización Llingüística, como presidente. La obra, presentada baxo’l nomatu de ‘El Cineasta’, propón una reflexón contemporánea sobre’l séptimu arte y la so capacidá pa recuperar la memoria y la identidá d’Asturies, combinando la mirada personal del cinéfilu cola conocencia y la esperiencia del cineasta profesional.
Güei, mentes, comunicábase que Paula Pulgar consiguía con una historia centrada nel mundu animal el gallardón dedicáu a la lliteratura pa los más mozos. Foi con ‘Secretos’, testu qu’integra’l léxicu tradicional nun asturianu actual con un «mui bon manexu del idioma». El xuráu, presidíu tamién por Antón García y conformáu pol alcalde de Cabranes, Gerardo Fabián Fernández; Alonso Zamora Canellada; Alba Carballo; Alba Sánchez Batalla; y Xurde Fernández Fernández, ganador l’añu pasáu por por ‘Ascensoristes S. A.’, obra fecha en comuña con Marián García, destacó’l plantegamientu de la obra y la so temática, especialmente adaptada pala reciella.
Cada premiu cuenta con una recompensa de 6.000 euros y la publicación del llibru. Los escritores tamién van recibir un troféu nuna gala na que participen tolos gallardonaos.



