Ye’l cartafueyu turísticu que más piden n’Infoxixón, qu’agora s’edita nun formatu de llectura fácil y con un diseñu accesible pa toles persones.
Xixón Turismu ta acabante d’espublizar el cartafueyu nuevu del barriu de Cimavilla. Esti cartafueyu fízose en collaboración con Plena Inclusión Asturias. Esta organización foi la qu’adautó’l testu, preparó un planu accesible de la zona, validó’l documentu como de llectura fácil y encamentó pautes sobre’l diseñu y la maquetación. Ye’l primer cartafueyu turísticu editáu según esti métodu n’Asturies.
Esti ye’l pasu primeru p’adautar a llectura fácil tolos documentos de Xixón Turismu y pa que la mayor parte de les persones seyan quien a comprendelos. La llectura fácil ye un métodu que recueye pautes y encamientos sobre la redaición de testos, el diseñu y maquetación pa que la información seya accesible a les persones con dificultaes de comprensión llectora. Amás, ye preciso sorrayar el trabayu que faen les persones con discapacidá intelectual na adautación de documentos a llectura fácil, ya que son los grupos de validación los que determinen si’l trabayu de la persona qu’adauta ye o non correutu y el testu entiéndese.
El cartafueyu propón un percorríu pel barriu altu de Xixón: Campu Valdés, Termes Romanes, Palaciu Valdés, Muséu Casa Natal de Xovellanos, la plaza d’El llavaderu o Campu les monxes, el cerru de Santa Catalina y la plaza’l Marqués. Con parada nestos puntos, faise una introducción pequeña a la historia y anéudotes del barriu de Cimavilla y s’inclúi una descripción de los monumentos principales.
La publicación pue descargase na páxina web del Ayuntamientu (https://www.gijon.es/es/publicaciones/barrio-de-cimavilla) o pidir n’Infoxixón. Amás, cuenta con un códigu QR qu’enllaza cola web municipal pa les persones que quieran más información, ya que, p’asegurar la plena inclusión, el cartafueyu va ser l’únicu y válidu pa toles persones.
“Este trabajo se enmarca en el objetivo de posicionar a Gijón/Xixón como un destino turístico accesible y sostenible y en línea con nuestras certificaciones como Biosphere Gold Destination y Destino Turístico Inteligente”, Santos Tejón Llaneza, conceyal de Promocion Económica, Empléu, Turismu y Comercio Llocal de Gijón/Xixón.
Sobre Plena Inclusión Asturias
Plena inclusión Asturias representa a les persones con discapacidá intelectual o del desarrollu y a les sos families nel Principáu d’Asturies y ye’l muérganu de referencia nel desendolcu y aplicación de l’accesibilidá cognitiva na rexón. Foi’l primeru en poner en marcha trabayos de llectura fácil qu’algamaron reconocimientos nacionales ya internacionales. L’apueste pola accesibilidá cognitiva, y en concreto pola llectura fácil, ye ún de los sellos d’identidá de la organización, especialmente pol beneficiu bayuroso que da a un sector ampliu de la población, non sólo a les personas con discapacidá intelectual sinon a toles persones que tean dificultaes de comprensión (persones mayores, estranxeres…).
