Cuenta con una partida de 50.000 euros, con un máximu de 15.000 por elementu, qu’habrá tener interés etnográficu pa poder optar a l’ayuda
La restauración y conservación de llagares tradicionales con interés etnográfico va contar con ayuda del Gobiernu a partir d’esti añu. La Conseyería de Cultura, Política Llingüística y Deporte espublizó nel Boletín Oficial del Principáu d’Asturies (BOPA) d’ayeri la convocatoria d’esta llinia nueva, que cuenta con una partida de 50.000 euros, depués de facer públiques les bases reguladores el 30 d’abril.
Van poder solicitar esta subvención en réxime de concurrencia participativa particulares o entidaes ensin ánimu d’arrequicimientu, que van recibir un máximu de 15.000 euros por proyeutu pa financiar trabayos de caltenimientu, conservación, restauración y recuperación de les carauterístiques orixinales de los llagares tradicionales, asina como intervenciones venceyaes a bienes muebles y inmuebles asociaos a estos espacios. Esta midida da cumplimiento a ún de los compromisos recoyíos nel programa pluriañal d’aiciones de preservación y promoción de la cultura sidrera asturiana impulsáu pol Gobierno depués del so reconocimiento pola UNESCO como Patrimonio Cultural Inmaterial.
El plazu pa presentar solicitúes a esta ayuda entama güei y va pesllase’l 10 de xunu. La convocatoria afita un periodu d’execución ampliu pa facilitar el desendolcu de les actuaciones: van subvencionase gastos fechos ente’l 1 de xineru d’esti añu y el 31 de xunetu del 2027.
