El concursu lliterariu qu’entama la Fundación Municipal de Cultura, Educación y Universidá Popular n’alcordanza del poeta de Deva rescampla pola calidá alta de los testos gallardonaos, obra d’autores como Milio Rodríguez Cueto o Francisco ‘Paco’ Álvarez
Falar d’Andrés Solar Santurio ye falar d’un nome clave de la lliteratura asturiana magar que la so creatividá lliteraria quedara cortada a los 29 años por un fatal accidente de tráficu na Navidá de 1984. Perdía Asturies a un poeta referente, pero Asturies, y el so Xixón natal, nunca escaecieron a Solar y la so obra, como amuesa’l fechu de que’l de Deva diera per tres décadaes nome a los premios de la Xunta pola Defensa de la Llingua Asturiana (XDLA) y, dende va 6 años, al concursu qu’entama l’Ayuntamientu al traviés de la Fundación Municipal de Cultura, Educación y Universidá Popular pa «favorecer y promover la creación lliteraria n’asturianu y la so normalización social».
La so sesta edición encara’l final del plazu d’entrega d’orixinales, afitáu pal xueves 10 de setiembre. Pueden participar toles persones mayores d’edá con noveles que tengan una estensión d’ente 75 y 130 fueyes en DIN-A4 a doble espaciu y per una cara, qu’han de facer llegar per Internet o per corréu postal. El ganador va llevar una recompensa de 3.000 euros.
![1x1 pixel counter : <img decoding="async" src="https://track.adform.net/adfserve/?bn=89541117;1x1inv=1;srctype=3;gdpr=${GDPR};gdpr_consent=${GDPR_CONSENT_50};ord=[timestamp]" border="0" width="1" height="1"/>](https://migijon.com/wp-content/uploads/2026/08/download-1.gif)
![1x1 pixel counter : <img decoding="async" src="https://track.adform.net/adfserve/?bn=89541117;1x1inv=1;srctype=3;gdpr=${GDPR};gdpr_consent=${GDPR_CONSENT_50};ord=[timestamp]" border="0" width="1" height="1"/>](https://migijon.com/wp-content/uploads/2026/08/download-2.gif)
Dende la so creación nel 2001, l’Andrés Solar contó con ganadores de reconocíu prestixu nes nueses lletres. Milio Rodríguez Cueto, con ‘Fortuna’, foi’l primeru en ganalu; siguiríenlu Gonzalo G. Barreñada con ‘La guerra del Medrosu’, Ricardo Candás con ‘Aire mugoriento’, Pablo Rodríguez Medina con ‘El pesu de la nieve’ y, na edición última, el periodista xixonés Francisco ‘Paco’ Álvarez con ‘Coses que facer en Xixón cuando tas muertu’, toes obres de gran calidá lliteraria que s’espublizaron darréu.
