La Comida Popular del domingu n’El Parchís con un platu de caún de los territorios garra puxu depués de la esperiencia del añu pasáu nun certame que dende’l martes va ufrir actividaes per tola ciudá; el vienres va celebrase’l desfile y la gala na Plaza Mayor cola presencia de toles formaciones participantes
El soníu de la gaita toma protagonismu un añu más en Xixón a les puertes de les fiestes de la ciudá. Entama mañana un edición nueva, la ventena sesta, del Festival de Gaites de Villa de Xixón, que nesta ocasión va axuntar la música tradicional d’Asturies, Bretaña, Escocia, Galicia y Illes Balears,cuatro territorios de raigañu celta y l’archipiélagu mediterraneu: «Una de les facetes importantes del festival ye contar con bandes de tol mundu, incluyío Mallorca. Anque nun son celtes, tienen una tradición de gaita, más desconocida que la nuestra. La gaita ta mui espardida en toa Europa y nós intentamos reflexar un poco toes eses variantes, que puedan venir al festival», esplicaba esta mañana na presentación del eventu, celebrada na Casa la Palmera, José Luis García Díaz, direutor de la Banda de Gaites Villa de Xixón, organizadora xunto con Magüeta y Villa de Xovellanos del certame, nel que tamién collabora Divertia.
Una gran ocasión pa descubrir la música balear y pa tornara sentir los sones del restu de territorios, pero tamién pa saborgar la so comida gracies a la Xi Comida Popular-Folixa Intercéltica n’El Parchís, que repite’l domingu a les 14 hores después de la bona esperiencia del añu pasáu. Los presentes van poder disfrutar d’un menú compuestu por sobrassada, galette bretona, sarmale rumana, pastel escocés de carne y llacón con cachelos, amás del asturianu arroz con lleche. El so preciu ye de 18 euros, cola posibilidá d’un menú infantil por 12, y l’aforu y llendáu, polo que se recomienda acutar con antelación.
![1x1 pixel counter : <img decoding="async" src="https://track.adform.net/adfserve/?bn=89541117;1x1inv=1;srctype=3;gdpr=${GDPR};gdpr_consent=${GDPR_CONSENT_50};ord=[timestamp]" border="0" width="1" height="1"/>](https://migijon.com/wp-content/uploads/2026/08/download-1.gif)
![1x1 pixel counter : <img decoding="async" src="https://track.adform.net/adfserve/?bn=89541117;1x1inv=1;srctype=3;gdpr=${GDPR};gdpr_consent=${GDPR_CONSENT_50};ord=[timestamp]" border="0" width="1" height="1"/>](https://migijon.com/wp-content/uploads/2026/08/download-2.gif)
La otra gran cita del XXVI Festival de Gaites Villa de Xixón ye’l Desfile Intercélticu del vienres, con salida a les 20 hores de La Escalerona y final na Plaza Mayor, onde va celebrase la gala a les 21.30 con tolos participantes: Milngavie Pipe Band (Escocia), Banda de Gaitas Nova Fronteira (Galicia), Xeremiers de Sóller (Illes Balears) y la Bagad Arvorizion Karnag (Bretaña), amás de la llocal Villa de Xixón. Cinco agrupaciones que van regalar actuaciones estos díes per tola ciudá nuna programación que tamién va contar con conciertos n’El Parchís de Leirana, proyeutu de Nel Villanueva de nueva creación, el martes; Ramsés y Ambás, el miércoles; y José Manuel Tejedor, el sábado, amás d’otres munches actividaes.
