‘Tía Miseria’, de Covenant Producciones, obra ganadora l’añu pasáu, va abrir esta selmana la parte de festival d’esti gallardón, na que les cuatro obres que pasaron el corte van poner n’escena n’Uviéu les sos propuestes frente al públicu; l’accesu ye de baldre
El Premiu y Festival Nel Amaro de Teatru en Llingua Asturiana o Gallego-asturiano adelanta esti añu la so parte de festival, que torna a tener como sede l’uvieín Teatru Filarmónica. Ochobre va acoyer la representación de les cuatro finalistes, pero enantes, mañana, va ponese n’escena la obra ganadora del añu pasáu, novena edición, ‘Tía Miseria’, de Covenant Producciones. Va ser a les 20 hores cuando’l públicu, que tien accesu llibre, va poder disfrutar otra vuelta d’esti montaxe encamentáu a mozos dende los 13 años que ta dirixíu por Miguel Cubero a partir d’una historia de Carlos Alba ‘Cellero’. Ésti bebe de la tradición oral, con histories y saberes populares que surden al traviés del teatru, los cantares, la danza y l’humor; un viaxe ente’l pasáu y el presente pa falar de la memoria, la infancia, la vieyera, la muerte y el poder.
El primer finalista en salir a escena va ser, el vienres viniente a les 18.30 hores, Higiénico Papel Teatro cola so propuesta ‘Riquete’l del Copete’. La compañía ganadora nel 2018 y 2020 con ‘Hansel y Gretel’ y ‘El viaxe de Covaletti’, de manera respeutiva, fai una revisión del cuentu de Charles Perrault que xuega colos sos personaxes y la posibilidá de modificar el final. Una selmana depués, el 9 d’ochobre, Guayominí Producciones con ‘caLORCAlor’, un viaxe hasta Fuente Vaqueros y l’universu de Federico García Lorca.
ElektraFiktion va llevar a escena’l 16 ‘Arde la viesca’, función qu’avera al públicu más nuevo’l cuidáu de la naturaleza y la prevención de les quemes forestales, y Luz de Gas Teatro ‘Dibúxame una pallabra’ el 25, que cuenta la historia d’Aisha, una neña que nun pue dir a escuela y qu’atopa nel dibuxu una forma de comunicase. El ganador que decida’l xuráu depués de presenciar en direuto les cuatro propuestes va llevar una recompensa de 6.000 euros y programaciones per tol territoriu al traviés del circuitu ‘Asturies, Cultura en Rede’.
