El club de natación adaptada, con sede n’Uviéu, cuenta anguaño con 20 deportistes de toa Asturies que compiten a nivel estatal con ésitu, como amuesa’l títulu de campeón de la Lliga AXA algamáu la temporada pasada, que tán cerca de revalidar na actual
Ye la natación ún de los ocho deportes presentes nel programa de los primeros Xuegos Paralímpicos de la historia, los de Roma 60. Dende entós, cada 4 años, la piscina ye siempre escenariu de récors, victories y grandes xestes protagonizaes por nadadores con discapacidáqu’atoparon nel mediu acuáticu’l so llugar. «Tienes una llibertá total. Al final, nel mediu terrestre cuéstanos más trabayu desplazanos y necesitamos, en munchos casos, ayudes téuniques pa poder facelo. Por contra, nel agua somos más llibres, tenemos una capacidá de movimientu mayor y nun hai dañu nengún porque nun hai impautu a nivel d’articulaciones nin nada»,valora Beatriz Álvarez Valderrama, entrenadora del Club Deportivo Mareastur y fundadora nel 2013 de la entidá con sede n’Uviéu, únicu específicu de natación adaptada d’Asturies —hai un segundu, l’Esguines, pero nun compite—, que define como «una modalidá deportiva que se prautica por persones con discapacidá y que tien, como’l so nombre indica, adaptaciones na so normativa pa poder garantizar que toles personas que la prautiquen puedan facelo».
Una ventena de nadadores asturianos d’ente 9 y 39 años compiten por esti club mientres suañen con poder tar dalgún día nesi escenariu. Pa ello entrenen con enfotu nes piscines del Parque del Oeste baxo les órdenes de los dos técnicos y dos auxiliares de la entidá, un trabayu que-yos permite tar ente los meyores de la natación adaptada, como amuesa’l títulu de campeones de la Lliga AXA de Natación Paralímpica la temporada pasada que, a falta de dos pruebes, Cádiz (payares) y Uviéu (avientu), tán cerca de revalidar. «Nutrímonos principalmente de la cantera de les escueles de la Federación de Deportes para Personas con Discapacidad Física del Principado de Asturias (FEDEMA). El club ta centráu na práutica deportiva y de competición y les escueles dan el serviciu previu pa que llueu se pueda competir», espresa l’andaluza.
Les primeres brazaes del Mareastur diéronse nel 2013 depués del desaniciu del Handisport, club al que llegó Álvarez Valderrama dende Huelva nel 2009 con namái 19 años. «Habiendo neños d’escueles de natación que taben en FEDEMA y deportistes que yá taben en competición, decídese crealu pa poder siguir dando esi amparu; que los deportistes que yá taben n’activu pudiesen siguir compitiendo y los que taben na escuela tuviesen la oportunidá de, nun futuru, poder competir. Handisport desapaez a lo último d’agostu y Mareastur naz en setiembre», rememora l’agora entrenadora, que lleva n’Uviéu 17 años.
Llueu d’unos entamos complicaos, «con falta de recursos económicos y una xunta direutiva novata, ensin esperiencia en xuntes direutives n’otres entidaes, nadadores n’activu entovía toos», el Mareastur foi consolidándose hasta llegar al llugar actual. «Poco a poco, faciendo equipu y, sobre manera, xenerando esa cantera; viendo cuáles yeren los oxetivos y la proyeición que podía tener. Ye verdá qu’evolucionó muncho más de lo que pensábamos nosotros, ente otres coses, porque fuimos campeones de Lliga», valora. A esti ésitu hai que sumar los cuatro nadadores qu’esti añu foron convocaos coles sos correspondientes federaciones (Paula Sánchez Ollacarizqueta, Martín Alonso Fernández, Alejandro Gallo y Mateo Páramo, amás de la nadadora grupista Olaya Guo González Tess) y participaciones l’añu pasáu n’Estambul nos Xuegos Europeos de la Mocedá.
«Creo que la natación adaptada agora mesmo ta nun estáu de forma mui bonu. Somos una zona potente en cuanto al desenvolvimientu de la natación. Igual nun tenemos agora mesmu nengún paralímpicu, pero ye cierto que contamos con campeones de España y tenemos sobre manera xente que prautica esti deporte», espresa Álvarez Valderrama. «Ye un medio que favorez la rehabilitación nos nuesos procesos, que recueye tolo que podemos necesitar, tolo que nos pue ayudar a sentinos más llibres y, sobre manera, a desendolcar toles nueses capacidaes. Y llueu, a nivel de grupu humanu, hai un ambiente maraviyosu qu’ayuda tamién a esa parte de socialización. Al final ye una familia», retoma.
Un grupu qu’entrena, nel casu de los que compiten na Lliga AXA, seis díes a la selmana, una hora y media cada día, nunes instalaciones, les del Parque del Oeste, «que cumplen coles necesidaes que toos estos deportistes». N’avientu, los díes 12 y 13, va acoyer l’Open Mareastur, la gran cita del añu pa esti club, prueba con presencia de nadadores internaciones en busca de marques que sirve de séptima jornada de la Lliga AXA y de IX Campenatu d’Asturies, y a la que’l públicu va poder acceder a la grada nel ascensor recientemente instaláu. Ensin dulda, una bona oportunidá p’averase y comprobar in situ l’altu nivel de la natación adaptada asturiana.
