Son tres obres históriques qu’ingresaron recién na coleición procedentes de la biblioteca del arquitecto Borja Bordiu Cienfuegos-Jovellanos y que se van poder ver en L’Abellugu, vieyu comedor del restorán de la instalación, que pasa a ser un espaciu nuevu de llectura
El xueves ye’l Día del Llibru y, con motivu d’esta celebración, el Muséu del Pueblu d’Asturies presenta L’Abellugu, comedor del vieyu restorán de la instalación que se convierte nun espaciu de llectura nel que poder consultar tolos llibros editaos pol muséu y otros sobre antropoloxía, etnografía, fotografía, historia, etc., materies qu’estudia la institución xixonesa. Amás, dende’l mesmu día 23 y hasta el 3 de mayo va haber exemplares lliberaos nel llugar pa que los usuarios puedan llevalos pa la so llectura, lo que se conoz como ‘bookcrossing’.
L’espaciu va incorporar tamién una vitrina onde van esponese ‘Llibros d’esceición’. Como nel llugar ta presente la muestra ‘Cartelos n’asturianu (1976-2005)’, una esbilla de 48 exemplares de los 1.983 que conformen la coleición de la Fundació Belenos, cedida al Muséu del Pueblu d’Asturies, los tres primeros n’ocupala van tar venceyaos cola llingua asturiana. Vienen tamién d’una donación reciente, nesti casu de la biblioteca del arquitecto Borja Bordiu Cienfuegos-Jovellanos, fináu nel 2024, y son el manuscrito original del 1788 de Carlos González Posada del ‘Diccionario de algunas voces del dialecto asturiano dispuesto por orden alfabético, año de 1788’, primer diccionariu conocido del idioma; ‘Colección de poesías en dialecto asturiano. Comprende las más selectas de Don Antonio González Reguera, Don Francisco Bernaldo de Quirós y Benavides, Don Antonio Balvidares, Don Bruno Fernández y Doña Josefa Jovellanos, con otras varias de autores desconocidos’ (1839, Uviéu. Imprenta de D. Benito González y Compañía), primer antoloxía de poesía n’asturianu espublizada, escoyida por José Caveda y Nava; y ‘Anteckningar om folkmalet i en trakt af Vestra Asturien’, tesis doctoral del llingüista suecu Åke Wilhelmsson Munthe sobre la variante occidental del asturianu fecha a partir d’una estancia en Cangas del Narcea nel 1886.
