La Federación de Asociaciones y Comisiones de Festejos de Gijón Vive lo que Sentimos presentó esti vienres con una espicha en Piñera’l llistáu de 17 folixes qu’entamen 15 coleutivos del conceyu dende’l 1 de mayu al 8 de payares; «nun ye una barraca y música pa baillar, les nueses fiestes traten de facer comunidá», destaquen
En xineru constituyéronse como federación 16 asociaciones y comisiones de festexos del conceyu qu’entamen romeríes tradicionales y fiestes populares y ayeri xuntáronse pa celebrar con una espicha la presentación del calendariu festivu pa esti 2026. Foi en Deva, en Sidra Piñera, y contó cola conducción de Paloma Llanos y l’asistencia de l’alcaldesa Carmen Moriyón, a la qu’Aitor Álvarez Fernández, presidente de Vive lo que Sentimos, como se llama dicha federación, agradeció-y, nun discursu en castellanu, «la nueva instrucción de fiestes del Conceyu de Xixón, na qu’influyimos presentando propuestes que non sólo garanticen la viabilidá de les fiestes tradicionales como les nuestres, sinón que tamién tenemos que dicir que nenguna de les nueses propuestes afeuta no más mínimo a otres asociaciones o comisiones de fiestes qu’opten por modelos organizativos distintos».
«Güei tamos los que nos xune un sentimientu, más allá de que síamos parroquies o un barriu de la ciudá. Tamos porque yera necesario xuninos pa defender y garantizar el futuru de les nueses fiestes y tenemos que dicilo: consiguímoslo. Nun ye una barraca y música pa baillar, les nueses fiestes traten de facer comunidá, texer llazos afeutivos ente los vecinos y vecines que participen d’elles», valoró’l tamién presidente de la Comisión de Festejos de Deva, qu’apuntó a los presentes: «Nun me digáis qu’hai cosa más guapa que discutir col vecín sobre la temperatura ideal de la sidra, el puntu del criollu nel bocadillu, o la cantidá de bébora qu’hai qu’echar nun cacharru. ¡Préstennos esos discutinios! Echámoslos de menos tol añu. Y naguamos por reproducilos, añu tres añu, la fin de selmana de fiestes».
En definitiva, Vive lo que Sentimos representa«les fiestes de los vecinos pa los vecinos», qu’arranquen «la selmana qu’entra pa honrar al Santu Cristu de L’Abadía Cenero y terminen allá per payares colos callos de Llantones». Ésti ye’l calendariu completu, 17 folixes entamaes por 15 coleutivos llueu de la disolución de Vega:
L’Abadía Cenero (Santu Cristu): 1, 2 y 3 de mayu
Montiana: 29, 30 y 31 de mayu
Castiello (San Pedro): 26, 27, 28 y 29 de xunu
Porceyo: 3, 4 y 5 de xunetu
Llantones (Nuesa Señora del Carme): 11, 12 y 13 de xunetu
Caldones: 17, 18, 19 y 20 de xunetu
Granda: del 21 al 27 de xunetu
Ciares (Romería de Ciares): 24, 25 y 26 de xunetu
Carbaínos: 1, 2 y 3 d’agostu
Bateao (Batiao): 7, 8 y 9 d’agostu
Deva: 7, 8 y 9 d’agostu
Fano: 8, 9 y 10 d’agostu
Fontaciera: 21, 22 y 23 d’agostu
L’Abadía Cenero (Día del Club): 28, 29 y 30 d’agostu
Serín: 5, 6, 7 y 8 de setiembre
Castiello (San Miguel): 25, 26, 27 y 28 de setiembre
Llantones (Los Callos): 6, 7 y 8 de payares
