El desplazamientu a la ciudá autónoma pa llevar tolos materiales donaos pola ciudadanía dientro de la campaña ‘Ante’l racismu, sofitu vecinal’, que tamién recaudó 7.000 euros, completóse con ésitu magar les complicaciones y un ambiente nel que «la violencia ta creciendo»
Salieron el sábadu en direición a Sevilla con una furgoneta alquilada con tolos materiales de primera necesidá donaos pola ciudadanía asturiana a la campaña ‘Ante’l racismu, sofitu vecinal’, con puntos d’entrega en Xixón, L’Entregu, Uviéu y Mieres. «Llevamos 25 sacos de dormir, munches llegumes, material d’hixene femenina ymédicu pa cures, munchísimos medicamentos, analgéxicos, antiinflamatorios, alcohol, agua oxixenada, cargadores, móviles, guantes… Un pocu de tou», rellata Diana Luaces, que s’encargó, en compañía d’Irene Ordóñez y Leticia Pumares, de desplazase a Ceuta pa llevar l’ayuda humanitaria a los migrantes que permenecen na ciudá autónoma dende la entrada masiva de lo último de xunetu y apoyaral empara los comerciantes ceutinos colos 7.000 euros recaudaos pa financiar el viaxe y facer gastu en negocios llocales. Y yá ayeri, camínde vuelta a Asturies, rellaten una realidá dura que-yos provocó «tristura».
Depués d’entregar los productos donaos nel almacén d’una asociación en Sevilla que s’encarga del so repartu en Ceuta, pola imposibilidá de llevalos elles de primer mano al ser d’alquiler la furgoneta, dirixéronse a Algeciras pa garrar a pie, yá’l domingu,el ‘ferry’ que-yos treslladaría a Ceuta. L’ambiente qu’atoparon nel barcu yá-yos dio una idea de la tensión que diben vivir na ciudá autónoma. «Falando con dos muyeres que veníen de Madrid, una entrugóme que sí díbemos a la manifestación, porque había una manifestación pela nueche y nun lo sabíamos. Asina, respondi-y que qué manifestación, a lo que me respondió que pola invasión. ¿O venís a los campamentos?, dixo», recuerda Luaces, que fai de vocera de les sos compañeres.
Yá en tierra, foron identificaes por axentes de la Guardia Civil, «nosotres y un chaval d’orixe marroquín, al restu nun-yos pararon», y vivieron otru momentu que-yos punxo entá más n’alerta. «Mientres esperábamos a una compañera que lleva unes selmanes ellí faciendo semeyes que diba dir abuscanos en furgoneta, acercósenos un paisanu d’unos 50 o 60 años y dixónos si yéremos de la ONG. Respondi-y que non. Más tarde dime cuenta que yera pola furgoneta que venía de Pamplona», rellata en referencia a la de la organización Negu Gorriak/Derecho a Techo qu’esi mesmu día provocó la respuesta de ciudadanos ceutinos, movilizados a la entrada del puertu, hasta’l puntu d’obligar a la Policía a facer disparos al aire.
«Decidimos meter les mochiles na furgo de la nuesa compañera y andar ensin elles pa nun llamar l’atención. De fechu, yo punxi un vestíu llargu», recuerda. Los primeros momentos en Ceuta sirvieron a les tres, qu’en primer llugar se dirixeron a El Trampolín, pa decatase del gran despliegue policial y militar esistente na ciudá autónoma. «Ellí pela mañana había otra manifestación y unos chavales metiéronnos dientro de les tiendes pa que nun nos vieren, porque si non… Creo que l’ayuda humanitaria ye más odiada agora que los propios migrantes. Y polo que nos dixo la compañera que lleva ellí tres selmanes, el tema de la violencia ta creciendo», apuntó.
La situación llevó-yos a evitar el centru de la ciudá autónoma y movese nos sos dos díes d’estancia na zona de los campamentos, «onde nos sentíamos más tranquiles». Ellí pudieron conocer a munchos ceutinos musulmanes ayudando a los migrantes, rescamplando un grupu de muyeres del barriu de La Estación que, «con tar un poco con elles, demostráronnos qu’elles soles podíen llevar tolo que recoyimos». «Son un coleutivu de muyeres que se conocen por una asociación cultural, que viven ellí y qu’entamaron a repartir ayuda col so dineru. Yo sentíles nel programa ‘Carne Cruda’ y púnxime en contautu con elles. Queríemos tener una toma de contautu primero enantes de nada. Tomamos un café con elles y sólo conocer que taben llevando a neños a casa pa que se llavaren…», amplía la voluntaria xixonesa.
En comercios de la zona, evitando finalmente «pola violencia que ser respiraba» los del centro,«compramos 50 caxes de leche, 300 compreses… Son campamentos quesólo tienen muyeres y críes. Compramos tamién 100 quilos d’atún pa facer bocadillos, 1.400 euros en carne para que coman dalgo caliente, 30 mantes, 40 caxes de pañales… Hasta los 7.000 euros». Yá en casa depués de llevar la solidaridá asturiana a Ceuta, Luaces reconoz un sentimientu de «tristura. Llegué a llorar ellí en delles ocasiones. Pero tamién de satisfaición por saber qu’hai xente perempática, persolidaria».
¿Y agora que se pue facer dende Asturies? «Hai organizaciones in situ, como No Name Kitchen, a la que, por cierto, tán echando-y mierda enrriba, que tán ayudando, que tán ehí en primer llinia. Yo, que yá tuvi ehí viendo’l trabayu d’estes muyeres y d’otra muyer que xestiona’l campamentu de muyeres, puedo dicir qu’esi dineru llega y esi dineru destínase ellí. Entós, podría organizase otru tipu de campaña más prollongada nel tiempu, podemos siguir echando una mano», destaca esta voluntaria, que llanza un mensaxe: «Que nun se nos escaeza que tenemos que poner nel centru a les persones. Tamos falando de menores que nun tán acompañaos, críos que tan sólos; que tamos falando de miles de persones, que nun conocemos los datos, persones mayores per toa Ceuta, families. Tenemos que ser empáticos».
