Fina Helena Trexu, escritora y fundadora del Grupu Epona

L’autora de Sama, mui venceyada a Xixón, dexa una importante buelga pol so trabayu lliterariu y de dignificación del asturianu, asina como pol so compromisu feminista y pa con Asturies

El vienres finaba en Xixón, a los 82 años, Helena Trexu Fombella. La so familia daba anuncia de la murnia noticia al traviés d’Iniciativa pol Asturianu y les reaiciones nun tardaron en asocedese. «Una muyer valiente, un compromisu irreducible col asturianu», espresaba Xosé Antón González Riaño, presidente de l’Academia de la Llingua Asturiana (ALLA), institución que, de manera oficial, referíase a ella como «una persona que llevaba la dignificación y la recuperación de la llingua asturiana por bandera y que siempres tuvo claro’l papel de les muyeres y la lliteratura nesa xera». Mientres, el coleutivu que trabaya pa la normalización del idioma treslladaba «el so pesar pola perda d’una autora fundamental de la lliteratura n’asturianu» y reivindicaba’l «valor de la so obra y del so compromisu cola llingua asturiana», y la asociación d’escritores PEN Asturianu, de la que formaba parte, quixo «acompañar a la so familia y amigos nesti momentu de despidida d’esta muyer escritora, pero tamién activista feminista, animalista y de tantes causes xustes».

Nacida en Sama nel 1942, la escritora pasó una etapa de la so vida en Cataluña y regresó a Asturies na década de los 80, cuando un cursu d’asturianu na Universidá Popular de Xixón puestu por Carlos Rubiera averóla al asturianismu. Asina, implícase dafechu nesti movimientu dende una perspeutiva cultural y política. La so trayectoria nel ámbitu lliterariu inclúi una amplia producción de poesía, narrativa p’adultos y lliteratura infantil y xuvenil. Nel 1989 entama na edición con ‘Camientos, coses, curuxes’, conxuntu de poemes escritos tiempu atrás nos que l’autora amuesa los sos esmolecimientos por Asturies, la so propia esistencia o la realidá social que l’arrodia, y nel 1991 algama’l Premiu de Poesía de L’Entregu, al que va siguir nel 1995 el Premiu de Traducción de l’Academia de la Llingua Asturiana pola adaptación de la obra de Salvador Espriu ‘El caminate y la muria’.

El so segundu poemariu, ‘Nalón’, asoleyaríase nel 1997, y nel 1999 fundó l’Asociación Cultural Grupu Epona, entidá centrada na realización de cuentacuentos y talleres infantiles impartíos n’asturianu, asina como na edición de llibros. Foron munchos los títulos propios asoleyaos dende entós, asina como antoloxíes de muyeres pa poner en valor el papel femenín na lliteratura asturiana, otru de los sos enfotos. Nesti sieglu nun faltaríen reconocimientos como’ VIII Certame Lliterariu Vital Aza, nel 2001, con ‘Abril’, o II’ Concursu de Rellatos de Muyeres del Conceyu de Llaviana por ‘Onde’l ríu besa la mar’, ente otros munchos. ‘Piedra gris con rellumos doraos’, trabayu d’investigación sobre muyeres dedicaes a la música del 2021, y la novela ‘Víes’ (Trabe), nel 2023, foron les sos obres postreres.

Trexu yera una asistente habitual de les charres sobre lliteratura y cultura asturiana que s’entamen, sobre manera en Xixón, y nun duldaba n’intervenir nel turnu final y compartir la so opinión colos presentes. No político, asitióse na izquierda nacionaliega y nel so momentu llegó a participar nes llistes d’Andecha Astur.

PUBLICIDAD

La so despidida tuvo llugar ayeri en Xixón con un actu acompañáu col soníu de la gaita y contó cola presencia de familiares, amigos y escritores. Ente los asistentes tuvieron la conseyera de Cultura, Política Llingüística y Deporte, Ana Vanessa Gutiérrez, amás d’autores como Inaciu Galán o Sofía Fernández Castañón.