Granda reivindica la romería tradicional coles sos Fiestes de Santana

Esti martes entama la celebración na parroquia xixonesa cola llectura del pregón per parte de Francisco Miravalles ‘Paco La Carbayera’ y la escoyeta de la Xana y el Trasgu; pal domingu, día de la romería, la comisión anima a vistir con traxe tradicional nuna xornada que va pesllar un añu más la Nueche Celta

Les Fiestes de Santana yá tán equí. Esta tarde entama un añu más una celebración na que la Comisión de Fiestes de Granda, que participa na Federación Vive lo que Sentimos, enfótase en «reivindicar la romería tradicional». Una declaración d’intenciones que resume nun videu, ‘Legado’, disponible en redes sociales, nel que participen vecinos contando «qué ye la romería de Granda pa ellos». «Ye baille, sidra, comida, convivir colos del pueblu…», resume Gloria Sánchez Muñiz, miembru d’una comisión que se ta movilizando pal domingu enllenar la Carbayera de traxes tradicionales.

Ye’l domingu’l día grande, el de la romería, pero vecines y vecinos de Granda arranquen güei colos festexos. A les 20 hores Francisco Miravalles, conocíu como Paco La Carbayera por ser propietariu del conocíu restorán, va lleer el pregón de les fiestes nel llocal social nun actu que va siguir cola escoyeta de la Xana y del Trasgu d’esti añu. La primer xornada va pesllase con sidra y un pinchéu.

La X Arrancadera, la ‘jira’ al área recreativa de Granda, va desenvolvese mañana pela tarde, mentes que’l xueves va ser el día especial pa la reciella, que va poder disfruta dende les 17 hores nel polideportivu d’una fiesta de la espluma. La sardinada y los tortos con picadiellu del vienres, dende les 21 hores, na primer verbena, que va animar Vas Bailar, van servir darréu pa calecer motores pal sábadu, cuando los vecinos van xuntase a les 14 hores pa la corderada. La comisión recuerda que pa poder xintar corderu ye necesario retirar el vale, que tien un preciu de 35 euros, contautando col teléfonu 616.102.930.

El tardéu na carpa va acompañase, dende les 17 hores, de la V Competición de Balón Prisioneru y, de les 19, el taller infantil de repostería ‘Grandachef’. La segunda verbena va principiar a les 20.30 hores col Grupo Límite y Vas Bailar.

PUBLICIDAD

XXVII Nueche Celta

Una alborada va llamar a la fiesta’l domingu, día de la romería. La misa va celebrase a les 11, pa siguir colaprocesión y la puya’l ramu. El Mercadín Asturianu va abrir al meudía en La Carbayera, onde los vecinos van axuntase nesta guapa tradición que va allargase cola XXVII Nueche Celta. Dende les 21 hores van actuar nel escenariu Herbamora, que va presentar en Granda’l so videoclip ‘Eclipse total’, Abéu y los gallegos Mediarea. Enantes, a les 19 hores, va ponese untaller de pandereta y baille tradicional.

Pa finar les fiestes, el Llunes de Santanín va dicise misa polos difuntos al meudía y, de tarde, va entregase’l bollu y la botella de vinu a los socios de 19.30 a les 21 hores. La competición de tiru cuerda, a les 20, ente solteros y casaos, y una cena de xermandía con cantares de chigre van servir de despidida a una celebración de les de tola vida.