Iniciativa pol Asturianu resalta’l compromisu col asturianu del actor José Antonio Lobato
“Foi un defensor del idioma que nun tuvo problema nengún en sofitar la oficialidá públicamente”
“Esi compromisu llingüísticu llevolu a participar en delles movilizaciones y a convertise nun voceru d’esta reclamación”
Nota de prensa de Iniciativa pol Asturianu
UVIÉU, 14/09/2020. Iniciativa pol Asturianu quier treslladar a los familiares, amistaes y compañeros y compañeres del mundu del teatru el pésame de tola organización pola perda del actor José Antonio Lobato. Amás la entidá quier resaltar el so compromisu col asturianu dientro de la so carrera profesional y nel so ámbitu personal.
Nesi sentíu, la organización recuerda que “foi un defensor del idioma que nun tuvo problema nengún en sofitar la oficialidá públicamente participando en diferentes campañes en defensa del reconomientu de la llingua asturiana amás de participar en munchos proyectos de cine, teatro… usando l’asturianu”.
Dende Iniciativa pol Asturianu queremos señalar tamién que “esi compromisu llingüísticu llevólu a participar en delles movilizaciones y a convertise nun voceru d’esta reclamación”.Por too ello, queremos sumanos a esti día murniu pal teatru asturianu pola perda d’un profesional del teatru que supo entender el valir cultural del nuesu idioma y nun tuvo reparos en defender la oficialidá.
