Col tiempu corriendo en contra pol adelantu eleutoral del 29-P, esta vieya demanda del sector educativu pa dotar de los mesmos derechos llaborales que’l restu de docentes a los más de 300 maestros de la materia de Llingua Asturiana y Gallego-asturiano ha pasar agora pel filtru del Conseyu d’Estáu
La creación de la especialidá docente de Llingua Asturiana y Gallego-asturiano ta un poco más cerca. El Conseyu Escolar del Estáu, órganu de participación que fai un llabor consultivu, d’asesoramientu y propuesta al Gobiernu estatal, emitió ayeri un dictame favoratible a la modificación de los tres reales decretos (Primaria, Secundaria y Escueles Oficiales d’Idiomes) que permita a les autonomíes con llingua propia non oficial reconocida xurídicamente nos sos estatutos desenvolver estes especialidaes. Nun hebo enmiendes a la propuesta del Ministeriu d’Educación, Formación Profesional y Deportes a esta vieya demanda del sector educativu asturianu y del Executivu autonómicu que yá nel pasáu consiguiera’l sofitu d’esti organismu.
Autorizada la tramitación alministrativa urxente per parte del Conseyu de Ministros el 13 d’ochobre, el procesu sigue agora’l so cursu y el Real Decretu de modificación ha pasar el filtru del Conseyu d’Estáu entantes de tornar al propiu Conseyu de Ministros pa la so aprobación definitiva. Esto ha facese enantes del 29-P, yá qu’una vegada se celebren les eleiciones anticipaes el Gobiernu quedará en funciones y verá llendada la so capacidá pa modificar reales decretos.
Comisiones Obreres (CCOO) Enseñanza Asturias reclama entainar con esta última fase de la tramitación normativa «y que la incertidume derivada del contestu políticu actual, coles eleiciones xenerales previstes pal 29 de payares próximu, nun suponga un retrasu nuevu para una reivindicación qu’acumula más de 40 años d’espera». El sindicatu recuerda que «la creación d’especialidaes propies va permitir afitar un marcu específico pal reconocimientu profesional y la estabilidá llaboral de más de 300 docentes que, hasta agora, desenvolvieron el so trabayu en condiciones d’estraordinaria precariedá: contratos d’un máximu d’un cursu escolar, xornaes parciales, cambios de centru cada añu y ausencia d’una vía propia p’acceder a places como personal funcionariu de carrera». D’igual forma, afirma que «nun se pue garantizar el futuru d’una llingua nes aulas ensin garantizar tamién la estabilidá llaboral de los sos docentes».
