La FEA estrénase en Xixón con 27 editoriales presentes

El Gremiu d’Editores d’Asturies celebra per primer vez na ciudá la Feria de la Edición Asturiana (FEA); el Muséu del Ferrocarril d’Asturies acueye los puestos coles principales propuestes de los sellos asturianos y diferentes presentaciones y talleres

Decenes de persones pasiaron ayeri ente los vagones y llocomotores del Muséu del Ferrocarril d’Asturies en busca de llectures nueves con firma asturiana. 27 editoriales, la práutica totalidá de les que formen el Gremiu d’Editores d’Asturies, participen na IV Feria de la Edición Asturiana (FEA), que se celebra per primer vez en Xixón depués de tres años con Uviéu como sede. Una bona oportunidá pa conocer de primer mano les propuestes de los sellos de la comunidad y llevar ún o dellos llibros a casa, amás d’asistir a dalguna de les actividaes y presentaciones previstes

Güei y mañana sigue la FEA, qu’abre n’horariu de 12 a 14.30 y de 17 a 21 horas —el domingu la feria zarra una hora enantes, a les 20—. Al meudía va entamar la xornada cola presentación del álbum infantil ‘Rubén. Alma, leche y amor’, d’Olaya Rubio con ilustraciones de Eva Rami, pa siguir a les 13 cola del discu-llibru ‘Pop Piquiñín. Una escoyeta de les canciones de Petit Pop’ (La Fabriquina) y a les 14 cola de ‘La bruja, el herrero y el arco de Lughnasa’ (La Semeya), de José A. Oliver López. Yá de tarde, a les 17 hores, Valentín Monte Carreño, Benigno Gómez López e Ignacio Valdés Álvarez van dar a conocer ‘Cultura del azabache en el Camino de Santiago’ (Cicees), y, a les 18 hores, Miguel Watio y Monchi Álvarez ‘Rincones de Gijón’ (Delallama). ‘Aire en el aire. Poesía 2001–2025’ (Impronta), de José Luis García Martín, a les 19 hores, y ‘Xera. Antoloxía poética’ (Cuatro Gotes) de Berto García, a les 20, van pesllar el día.

El domingu a les 12 los visitantes van poder sentir a Ícaro Obeso falar del so ensayu ‘Un casinu ente la xungla’ (La Fabriquina), y Santiago Recio va tomar el relevu a les 13 hores con ‘Numantia’ (KRK). ‘Asturias en el plato’ (Delallama), de Susana G. Soto, va protagonizar l’actividá de les 14, mentes que pela tarde el taller infantil ‘Ilustra tu propio ogro’, iniciativa de Pintar-Pintar a partir de la llectura del álbum ‘Ramón Román Rodrigo’, de David Acera, Gloria Sagasti y Borja Sauras, va presta-y a la reciella. La presentación de ‘Constantino Suárez. L’alma fotográfica al traviés de la vanguardia’ (La Semeya), de María Pidal, va poner el ramu a la cuarta edición de la FEA.

PUBLICIDAD