La meyor sidra d’Asturies faise en Xixón

El XV Salón Sidra d’Asturies celebróse esti miércoles en La Pola Siero, alcuentru nel que tamién se reconoció a los llagares qu’ellaboren la meyor sidra esplumosa y filtrada, y al meyor collecheru; la entrenadora de fútbol Montse Tomé resultó escoyida embaxadora de la DOP d’esti 2026

La xixonesa Sidra Contrueces ye la meyor sidra natural de la comunidá. Decidió asina’l xuráu del XV Salón de Sidra d’Asturies, entamáu pol Conseyu Regulador de la Denominación d’Orixe Protexida (DOP) ayeri na Plaza d’Abastos de La Pola Siero cola participación de cerca de dos millares de persones y presencia de profesionales del sector sidreru, esto ye, llagareros, productores, collecheros, distribuyidores y hosteleros. La plata llevóla la sierense Quelo y el bronce Valdeboides, fecha pola mariñana Castañón.

El llagar maliayu El Gobernador recibió un doble reconocimientu, el de meyor sidra esplumosa por EM y el de meyor filtrada por Españar, mentes que Juan Antonio Junco recibió’l premiu al collecheru del añu y Montse Tomé resultó escoyida embaxadora de Sidra d’Asturies esti 2026. «La sidra nuevo DOP vien con una altísima calidá, foi un añu mui bonu de mazana al respeutive la calidá», aseguró en castellanu Jorge García Álvarez, presidente del Conseyu Regulador, que considera que «tamos nel meyor momentu de la sidra DOP, pero tamién nel meyor momentu pa trabayar por ello nos años próximos. Podemos dar un blincu cuantitativu y consumir lo nuestro, el productu asturianu».

Ente los retos que se marca García Álvarez ta «siguir medrando en ventes a un ritmu un 10 % tolos años, como venimos faciendo, hasta invertir la proporción actual qu’hai n’Asturies de consumu de sidra. Queremos llegar al 80 % de tol consumu d’Asturies», pa lo que se necesita «más plantaciones, más producción». Amás anunció la inclusión na DOP de la sidra de xelu y una sede nueva pal Conseyu Regulador que sía «un llugar d’alcuentru».

PUBLICIDAD