La propiedá del llocal de la cai Almacenes onde esti chigre tradicional lleva años trabayando tomó la decisión de vender, polo que «entramos en tiempu de descuentu»; «ensin vecinos nun hai vida y nel barriu El Carmen queden namás yá pisos de luxu y turísticos», avisen
Ún de los pocos abellugos nel centru de Xixón pa beber sidra bien cuidada y disfrutar de la gastronomía asturiana nun entornu tradicional, la Sidrería Canteli, ta viviendo les sos últimes hores. «Entramos en tiempu de descuentu» anuncia nes sos redes sociales, anque ensin fecha definitiva. El pieslle llegará cuando la propiedá del llocal, decidida a vender, atope comprador. «Ta nel so drechu y nun los culpamos por ello, porque amás tratáronnos siempre perbién», confirmen dende esti chigre, que se despide con una reflexón.
«Ca vuelta queden menos chigres tradicionales en Xixon y menos tovía nel centru, que ta convirtiéndose nun decoráu. Ensin vecinos nun hai vida y nel barriu El Carmen queden namás yá pisos de luxu y pisos turísticos. Esto ye la panacea’l turismu … Xixón tá vendíu al meyor postor ensin cortapisa denguna», llamenten los sos responsables d’esti negociu de la cai Almacenes. Una ciudá que ta enllenándose de «burguers, pizzerías, gastrobares, franquicies, grupos d’inversores, festivales y macrofestivales de food trucks…», lo que conduz a que «nun van quedar chigres nin chigreros, namás sociedaes llimitaes, que ver veremos qué pasa’l día que dean la espantayada». Ye por eso que zarren esta anuncia a los sos veceros con un «salú y ánimu pa resistir».
