Los docentes d’asturianu posponen una selmana la so movilización, que finalmente va ser frente a Presidencia

El retrasu na celebración del comprometíu conceyu ente la conseyera Ledo y la ministra Tolón, previstu nun primer momentu pa mayu, lleven a ADAE a convocar una aición nueva de protesta en demanda de la creación de la especialidá docente de Llingua Asturiana y Gallego-asturiano

La convocatoria yera pa güei a les 12.30 hores frente a la Conseyería d’Educación, pero finalmente va ser el martes a la mesma hora y énte la Sede de Presidencia. L’Asociación de Docentes d’Asturianu y Eonaviego/Gallego-asturiano (ADAE) decidió posponer siete díes la concentración programada la selmana pasada pola falta de noticies con respeuto a la celebración del conceyu anunciáu ente la conseyera d’Educación, Eva Ledo, y la ministra del ramu, Milagros Tolón, comprometíu pol propiu ministeriu, pa tratar la demanda de creación de la especialidá docente que lidera’l Gobiernu asturianu, hasta agora frenada por Madrid. Nun primer momentu, mayu yera’l marcu temporal pa la celebración del alcuentru, polo que’l mes y mediu pasáu ensin noticies considérase motivu suficiente ente les maestres y maestros de les materies pa tornar a salir a la cai pa esixir la fin de la so situación de discriminación llaboral.

Pendientes de manera diaria de l’axenda de Ledo, la incertidume entama a pesar ente los responsables d’ADAE, que lleven la so propuesta a Presidencia pa llamar l’atención del presidente Adrián Barbón en busca de desbloquiar la situación. Insisten en que la modificación de los reales decretos que-yos permitiría opositar y contar colos mesmos derechos que los sos compañeros de centru ye una cuestión de voluntá política.

PUBLICIDAD