Los Premios Patrimoniu Cultural nacen pa reconocer el llabor de persones y entidaes na so conservación y difusión

La Conseyería de Cultura, Política Llingüística y Turismu va entregar estes distinciones nes sos diez categoríes el 4 d’avientu, Santa Bárbola; créase tamién una llinia nueva de subvención pa proyeutos de cultura tradicional, pa la que se destinen 200.000 euros

La recuperación y tresmisión del patrimoniu cultural; del patrimoniu etnográficu; la memoria oral; les dances y bailles d’Asturies; les tradiciones asturianes; la cultura asturiana de la gaita; la quesera; la sidrera; la minera; y los conocimientos y saberes venceyaos a la cultura asturiana, son les diez estayescoles que va contar, nesta primer convocatoria, los Premios Patrimoniu Cultural d’Asturies, que crea la Conseyería de Cultura, Política Llingüística y Turismu pa reconocer el llabor de persones y entidaes na so defensa, conservación, estudiu, recuperación o difusión. Los gallardones, dotaos con 1.000 euros por categoría, van valorar tanto trayeutories como actuaciones concretesd’especial relevancia, y van entregase el 4 d’avientu, Santa Bárbola y aniversariu de la declaración de la cultura sidrera asturiana como Patrimoniu Cultural Inmaterial pola UNESCO.

«La cultura tradicional ye pilar de la nuestra identidá, y el nuestru oxetivu ye que disponga d’instrumentos de protección, pero tamién de recursos pa tresmitise, estudiase, divulgase, renovase y llegar a xeneraciones nueves», apuntó la conseyera Ana Vanessa Gutiérrez nel actu d’anuncia de los premios. Les candidatures habrán ser promovíes por entidaes, asociaciones y instituciones académiques, científiques o culturales venceyaes a la defensa del patrimoniu, amás de por particulares, nesti casu col aval de diez firmes.

L’asturianu o l’eonaviego como llingua vehicular

La otra anucia dada ayeri pola conseyera ye la puesta en marcha d’una llinia de subvenciones a proyeutos culturales, con una dotación de 200.000 euros. Ta destinada a entidaes llocales o organizaciones ensin ánimu d’arriquecimientu y va sofitar iniciatives de folclor —música, baille y lliteratura oral—; oficios y artesanía; deportes y xuegos tradicionales; gastronomía; arquiteutura y construcción tradicional; indumentaria; festividaes; y mazcaraes. «La convocatoria promueve la difusión de la cultura tradicional nes llingües propies d’Asturies, en que siempre s’espresó», apuntó Gutiérrez, polo que les iniciatives han tener como llingües vehiculares l’asturianu o l’eonaviego.