La Casa de Cultura vivió una tarde emotiva con muncha música y alcordances con ‘Universu Damián’, l’actu preparáu con ciñu pola Xunta pola Defensa de la Llingua Asturiana (XDLA) qu’aconceyó a artistes como Rodrigo Cuevas, Beatriz o Mariluz Cristóbal, y a munchos collacios
Mui poques butaques quedaron llibres pa presenciar ‘Universu Damián’ en la Casa de Cultura d’Avilés, un acontecimientu únicu onde poder ver, por exemplu, a Rodrigo Cuevas y Beatriz Rodríguez, de Grupo Beatriz, cantando xuntos. Y ye que la ocasión merecíalo. La Xunta pola Defensa de la Llingua Asturiana (XDLA) llevó al escenariu la música y les espresiones que más-y prestaben a Damián Barreiro, periodista y militante del coleutivu que dexó un furacu grande nel mundu cultural asturianu cuando en febreru dexó esti mundu con namái 40 años, nun homenaxe fechu con muchu ciñu.
Nun faltó a la cita la conseyera de Cultura, Política Llingüística y Deporte, Ana Vanessa Gutiérrez, que lleó unes pallabres. Tamién muchos compañeros y collacios, como Xune Elipe, que falaron dende un escenariu decoráu con elementos de la cultura pop asturiana que tanto-y prestaben a Barreiro, como una Santina, un madreñoxiru o un playmobil vistíu d’asturiana, de lo que s’encargó Pepe Espina.
Proyeutáronse vídeos del canal de YouTube de Barreiro, ‘Horros & Frixuelos’, y d’entrevistes, anque la parte musical foi la que tuvo más pesu. L’actriz avilesina Natalia Suárez Ríos foi dando pasu a artistes de la escena cultural asturiana y más contemporánea, como Rodrigo Cuevas y Beatriz, que regalaron al públicu un momentu especial cuando cantaron xuntos, o Mariluz Cristóbal Caunedo, acompañada la gaita por Llorián García, Algaire y Fruela 757. Un total de dos hores d’emotividá, nes que nun faltaron referencies a la oficialidá del asturianu y del gallego-asturiano, en memoria d’una persona que dexó buelga n’Asturies.
