L’asociación, que pretende crear un espaciu alternativu pa «tratar temes que puedan interesar a la ciudadanía en xeneral y a la población xoven en particular», entama pa esti vienres la charra-coloquiu ‘¿Podemos planificar una Villaviciosa habitable?’, a cargu de Sergio González Begega
«Muncha xente del nuesu entornu nun pue acceder a un alquiler o comprar una casa en Villaviciosa», asegura Ulises Tuero, miembru de Magaya Maliaya, coleutivu que se presenta esta tarde con una charra-coloquiu al respeuto nel Atenéu Obreru de Villaviciosa, anque yá nel Antroxu salió a la cai con mazcaritos relativos al problema de la vivienda. La conferencia, que va principiar a les 19 hores, va ponela Sergio GonzálezBegega, profesor de la Universidá d’Uviéu perteneciente al Institutu de Recursos Naturales y Ordenación del Territoriu (INDUROT), baxo’l nome de ‘¿Podemos planificar una Villaviciosa habitable?’. L’espertu va centrase nes viviendes d’usu turísticu (VUT) y nel Plan Xeneral d’Ordenación (PXO).
Apunta Tuero que «conocemos la esperiencia d’otros conceyos, como Llanes o Ribeseya, o del Levante, y queremos reflexonar sobre ello, crear un poco de debate na ciudadanía y proponer o aportar soluciones». Cumple asina con ún de los sos oxetivos de Magaya Maliaya, «coleutivo de xente mozo de diferentes edaes que naz cola idea de crear un espaciu d’ociu y cultura alternativu en Villaviciosa nel que tratar temes que puedan interesar a la ciudadanía en xeneral y a la población xoven en particular».
