La porruana, con un estilu mui identificable, dedícase anguaño n’esclusiva a la creación artística y cuenta con una llista d’espera de 3 años d’encargos pa pintar esti instrumentu; la tradición oral, y polo tanto la llingua asturiana, sobre manera la variante oriental, ta mui presente nel so trabayu
Un encargu, poco enantes de la pandemia, foi l’aniciu. «Yo nunca pintara una pandereta. La primera yera con otru estilu, más realista, y depués les que tenía per casu fui pintándoles col mio estilu. A partir d’ehí salieron les que faigo agora», recuerda Nieves González, que cuenta con una llista d’espera de 3 años pa dar entá más arte a esti instrumentu de la nuesa tradición que ta viviendo un gran puxu nestos años últimos. Un llabor que-y ta dando un importante reconocimientu a esta porruana que tamién se dedica a la ilustración dixital y a la pintura, con un estilu mui reconocible. Ye tal el so ésitu actual que pidiórecién una escedencia nel so trabayu como profesora de Bachirreratu d’Artes pa dedicase dafechu a la creación artística.
Nun foi un camín cenciellu, sicasí, el que tuvo que percorrer. Depués de munchos intentos pa tratar de dar a conocer el so arte, «faciendo munches coses», la decoración de panderetes-y supunxo un reblagu, a lo que se xunió, al pasar la pandemia, la repercusión algamada por Porrúa en Bolas, eventu cultural y artísticu que se desenvuelve nesti llugar llaniscu y del que ye creadora y direutora, un diseñu pa la marca Puru Remangu, un mural n’Uviéu y la ilustración de ‘Ente la niebla’, discu-llibru del grupu Dixebra. «A partir d’ehí foron saliendo les coses, y entós, claro, como fui vendiendo, pudi llegar al momentu que tengo agora, nel que decidí intentar dedicame a ello», rellata.
Sobre’l so estilu, esplica que «trabayo nel marcu de la cultura asturiana. Los refranes, la tradición oral…, pero intentando asitialo siempre nel día de güei. El llinguaxe visual, anque tenga coses, como digo yo, del románicu, del prerománicu, tamién tien un llinguaxe modernu». «Tamos nun momentu nel que paez que se nos ta acabando la identidá, la globalización yá llegó toles partes: toos vestímonos igual, compartimos una cultura visual… Entós, volver a tirar de lo propio, de los raigaños, a tol mundu-y gusta. Al final, toos tamos xuntos na Tierra y queremos siguir calteniendo la tradición», cavila González sobre’l bon recibimientu del públicu a la so propuesta.
Amás de les panderetes, la ilustración dixital y la pintura ye lo que más trabaya, anque tamién tien una llinia de ropa propia, siempre emplegando una tipografía bien reconocible cola llingua asturiana presente. «Falando de tradición asturiana, ye imposible facelo en castellanu», afirma esta artista que tien mui en cuenta la variante propia, la oriental. «La cultura nun ye solo l’arte o la música, sinón tamién la llingua, y reivindicar l’asturianu ye tamién un actu hacia los mios antepasaos. Quiero recuperar cómo falaba la mi güela», sigue la porruana.
La so creación ta disponible en redes sociales y na so páxina web, onde viende panderetes, llaveros, retratos o otros encargos, con pidíos concentraos n’Asturies, anque tamién lleguen de Galicia y Cantabria. Como dicíamos enantes, la llista d’espera pa decorar l’instrumentu algama los 3 años. Pero, ¿cómo ye’l procesu? «Hay gente que te manda una semeya, otros que te dicen que ye pa tal fiesta y otros que te piden dalgo d’amor y entós yo-y cuento lo que tengo recopilao d’amor. Depués de falalo, enseño-y el conceutu y a partir d’ehí pinto la pandereta, anque agora toi faciendo una na que me dixeron que pintara lo que yo quixera», esplica al tiemu que destaca que’l so preciu final taba en 120 euros, pero un aumentu del costu del instrumentu va obligar a xubir esta cifra hasta los 140.
Al empar, cuenta con una importante demanda d’ilustración, tamién de fuera d’Asturies, pa diferentes veceros, anque llamenta que «dende qu’apaeció la IA baxó muncho la de les comisiones de fiestes». «En coses coleutives como son les fiestes quita un poco la humanidá y da pena porque al final presta contar con xente, los apoyos, texer redes de collaboración, en vez de tirar d’una intelixencia artificial que nun sabemos bien cómo funciona ni pa quién va», valora. Una competencia que nun impide a González el tar cumpliendo’l so suañu de volver a vivir en Porrúa reinterpretando la tradición al traviés del so arte.
