La banda formada por Ferla Megía, Argu y Cosme, que va asoleyar el so álbum de debú n’ochobre, toca esti martes na plaza’l Paragües con motivu de les fiestes de San Mateo
‘Barru (HG++OI”)’, primer cenciellu del discu de debú de Pvxarra, yá se pue sentir nes plataformes dixitales; ver en YouTube, yá que’l so llanzamientu vien acompañáu d’un videoclip; y disfrutase esta nueche en direuto. La banda qu’amiesta rap, hardcore y electrónica formada por Ferla Megía na producción, Argu nel baxu y Cosme na voz va tocar a les 21 hores na plaza del Paragües dientro del programa de les fiestes de San Mateo xunto a Sedientos de Cumbia (20 hores).
Esta composición de soníos y rap contundentes «da vueltes a los conceutos d’amor/desamor y xunión/separación. Compara los cuerpos con estructures que, si s’abandonen, pueden ser dañaes pol clima o la maleza. Toles cases d’un pueblu muéyense si orbaya, como toles persones d’un pueblu pueden vese afeutaes por un mesmu problema», apunten dende’l grupu, qu’incorpora al final del tema una frase de ‘Caballero andante (¡No me dejéis asíii!)’ d’Extremoduro, nel que s’inspira. Hasta la fecha Pvxarra, evolución de dellos años cristalizada como tal el branu pasáu, tien dao dellos conciertos y espublizaos cuatro cenciellos y una maqueta, de nome ‘Raspiar’, nun disponible en plataformes. ‘Ábrome en canal (lo que pasó darréu va ablucate)’ va ser el títuludel so primer discu, que se va espublizar el 5 d’ochobre.
